KRALENDIJK – E klup di futbòl di Tera Kòrá ku ta s.v. ATC bou di presidensia di sr. Aaron Martis, djasabra último den oranan tempran di anochi na su kluphùis na Tera Kòrá, a bendishoná unifòrm pa tur su ekiponan hubenil den e kategorianan di U-7 te ku U-19, tambe senior.
Ku esaki s.v. ATC ta preparando pa ta bon representá den kampionato futbòl 2020-2021 ku ta dediká tambe na s.v. ATC un bia mas, kampionato ku ta kuminsá djabièrnè awó 29 di ougùstùs 2020 den Stadion Kralendijk na Playa. E promé partido di e kampionato ta entre e ekiponan s.v. Uruguay di Antriòl Pariba i s.v. Young Boys di Nort Saliña

E parti ofisial di e enkuentro a kuminsá ku palabranan di bonbiní di sr. Aaron Martis ku ta alabes presidente di s.v. ATC. E la splika ku e bendishonamentu di e unifòrmnan lo bai ta otro for di loke nos konosé.
E dianan ku a pasa o sea e dianan aki, kasi tur dia nos tin yobida.
Na e fèlt di ATC tin un palu di Tamarein di mas ku 200 aña bieu.
Tur e dianan di yobiba nan a fangu e awa ku tabata basha for di e palu di tamarein. A usa takinan dje palu aki pa hinka esakinan den e awa i di e forma aki bendishoná e unifòrmnan. Algu sigur ku a hala atenshon.

E anochi aki tabatin tambe diferente invitado ku a hiba palabra despues di e presidente. Entre otro e presidente di FFB, sr. Ludwig “Luti” Balentin i diputado di deporte di nos isla, sr. James Kroon. E mandatario den su diskurso a komprometé su mes ku yerba artifisial lo bini sigur na Fèlt s.v. ATC. Tambe a hiba palabra e èks-pesidente di s.v. ATC sr. Frensel Janga ku na e okashon aki tambe a entregá un bunita plakat komo rekonosementu i gradisimentu pa e 25 añanan ku ela karga s.v. ATC di su bario komo presidente.
Riba potrètnan esenanan di e bendishonamentu di e unifòrmnan.

Share This
error: Content is protected !!