KRALENDIJK – Sentro Hubentut i Famia djaweps 13 di ougùstùs 2020 a entregá un total di 11 mama i tata sertifikado pa nan partisipashon na kurso di embaraso. E kurso ta tin un durashon di 6 siman, dos bes pa siman. E kurso ta konsistí di dos parti. Un parti teóriko na forma interaktivo kaminda mayornan ta partisipá aktivamente ku pregunta i remarke tokante e diferente tópikonan tratá.  Tópiko manera desaroyo di embaraso, parto, lechi di pechu i lechi di bòter, e ròl di “consultatiebureau” despues di parto, kuido di yu na kas despues di parto (kraamzorg) i inskripshon di beibi na registro sivil i tur lokual ta relashoná ku esaki. E di dos parti ta trata ehersisio speshal pa e hende muhé embarasá.

Komo parti di e kurso tin un seshon speshal pa futuro tatanan so. Durante e enkuentro aki un eks kursista ku a kaba di bira tata resientemente a kompartí su eksperensia ku e futuro tatanan. Banda di esaki e a duna nan teps kon pa manehá e diferente aspektonan i/o situashonnan ku lo por presentá durante embaraso i parto. Por último e a konsehá e tata nan kon pa atendé ku mama i yu despues di parto.

Mayornan a haña oportunidat pa skucha eksperensia kon un mama ku tin un beibi resien nasí ta eksperensiando su ròl di mama.  Tantu relashoná ku e parto, relashon entre mayor i yu, i relashon di pareha. 

Sentro Hubentut i Famia ta gradisí e fasilitadonan, señoranan Anita Groenendal, Tamara Martie, Jeamaliria Emerenciana, Mariëlle van Overmeeren, Rachel Casimiri, Gisella Clementina, Roos Breaken, Lucinda van der Wardt, Eva i Jenaldo Domacasse.

Pa mas informashon tokante Kurso di Embaraso o kualke otro pregunta relashoná ku sosten na famia por pasa na Kaya Prinses marie # 7 òf bèl na 701-5257 / 717-7300.

Share This
error: Content is protected !!