KRALENDIJK – Siman pasa a tuma lugá den sala di korte e kaso kaminda e kompania ku ta atende ku aviashon BAS N.V., enkabesá pa Larry Gerharts, ta pidi pa disolvé e kontrato laboral di 12 trahadó. Abogadonan di e trahadónan, Edward Winkel i Anthony Nicolaas no a impreshoná pa argumentunan di parti di abogado Lex Gonzales ku ta abogado di Larry Gerharts ku ta propietario di BAS N.V..

Larry Gerharts a splika e motibu ku el a yega na e desishon pa disolvé e kompania ta debí ku finansieramente e no por kontinuá, esaki tin di aber ku e problema di ‘corona vírùs’ i e otro kos ta ku e kompetensia na BIA ta inhustu. Apesar ku e trahadónan no tabata deseá pa stòp di traha, a tuma e desishon pa no kontinuá. Nan tabata deseá pa haña un daño di perwisio. E kompania BAS N.V. solamente ta deseá pa duna e trahadónan sèn di sesantia, loke ya nan tin derecho riba dje.

Entre otro a bin dilanti di parti di abogadonan Winkel i Nicolaas ku BAS N.V. no por proba ku nan situashon finansiero ta malu. Nan no a hasi petishon pa e supsidio relashoná ku COVID-19 pa por a paga trahadó. Nan a hasi esaki sin problema. No por sera e kompania pa motibu di COVID-19. Henter mundu ta pasando den momentunan difísil. E mundu di aviashon no ta un eksepshon. Si no por prueba ku durante último 5 aña kos tabata bai malu ku e kompania, no ta motibu pa terminá kontrakt ku trahadónan. Si por ehèmpel e último añanan e kompania a hasi ganashi di 50 mion dòler, no por kore ku trahadónan, debí ku e último tres luna a pèrdè kisas 100 mil dòler,”abogadonan a menshoná.

Pa motibu ku Gerharts ta deseá pa kita tur trahadó for di e kompania, lei di retiru BES ta bisa ku mester entrega un plan sosial, den kua ta deskribí e motibu, tres luna di antemano pa ministerio di asuntunan Sosial i Empleo evaluá. Tambe a bin dilanti ku Larry Gerharts ke pasa algun empleado di BAS N.V. pa e kompania AHS di Dudley Lourens. Abogado Nicolaas a haña e pensamentu aki un payasada total. Tambe el a menshoná ku si ta bèrdat polítika tabatin influensia den BIA, mester laga gobièrnu splika kon nan a mete den e asuntu. Pasobra esaki a kosta trabou di 12 persona ku tabata traha na BAS N.V. Ta importante pa menshoná ku e echo ta, ku den e kaso aki no por apelá e desishon di hues. Loke hues bisa, esei ta e final di e kaso.  

Share This
error: Content is protected !!