KRALENDIJK – Diputado Elvis Tjin Asjoe a papia na Radio Live 99.9 FM i entre otro el a elaborá tokante e situashon aktual relashoná ku e pandemia di COVID-19. “Tin diferente proyekto na horizonte di parti di invershonistanan pa desaroyo di Boneiru. Tin atenshon pa esaki di parti di gobierno, pa wak kon por kontinuá apesar di e situashon aktual relashoná ku e asuntu di vírùs. Otro kos ta ku a manda karta pa gabinete Hulandes pa por alargá e pakete di medida. Awor e ta te ku luna di òktober, sinembargo a pidi pa bai te  desèmber 2020. Na sèn ku a sobra di aña pasá, gobièrnu a reservá 7. 2 mion dòler, ku por yuda pa ehekutá proyektonan rápido. Tokante problemanan ku negoshinan tin, por tuma kontakto ku SZW pa papia di nan problema relashoná ku COVID -19.

Pa loke ta trata e asuntu di reunion di konseho insular ku MPB no ta kompletu, nos tin un miembro ku ta na Hulanda pa atendé su salú, kende ta Daisy Coffie. Su situashon ta stabil i pronto e ta na Boneiru pa kontinuá. Trabounan di drecha kaminda ta kana. Hulanda ta dispuesto pa yuda ku mas fondo finansiero pa  drecha kaminda. Etienne van de Horst a stòp. Tabatin un trabou ku a tarda poko pa e a ehekuta, i el a haña algu na Kòrsou i a tuma esaki.  

Tokante TCB no tin hunta di komisario aktualmente. No tin un komishon pa por nombra un direktor nobo. Ta trahando duru pa yega asina leu pa nombra un direktor.  

Na aeropuerto Flamingo tin diferente kos ta kanando pa mehorashon. E direktor nobo ta trahando riba e parti di e pista, loke ta rekerí atenshon. Resientemente algu a sosodé kaminda piedra a bula bai den motor di un avion. Aparte di e pista ta atendé tambe ku e parti di terminal pa amplia esaki. Asina tin diferente kos kanando.   

MPB su situashon den gobièrnu ta stabil. E periodo di gobernashon aktual ta kana bon. Un di e mihónan di último tempu. Tin bon stabilidat. Mester bisa ku mi persona, esta Elvis ta aktivo i no ta bai entrega batuta por lo pronto. Nos 3 komo diputado, huntu ku gezaghèber, ta kargando gobernashon di Boneiru huntu ku miembronan di konseho insular,” entre otro diputado Tjin Asjoe. 

Share This
error: Content is protected !!