KRALENDIJK – Direktiva di Fundashon Alzheimer Bonaire ta hopi konsiente ku e medidanan ku mester a tuma relashoná ku e Corona krisis tabatin un impakto grandi riba personanan ku Demensia pero tambe riba nan hendenan di kas. Nos situashon na Bonaire no ta un eksepshon. Ku seramentu di tur Pasadia na prinsipio di mart i awendia ku nan ta habrí parsialmente, famianan ku un ser keri ku Demensia, a haña nan mes obligá pa kuida e persona aki ku ménos yudansa djafó i di Thuiszorg.

No opstante e echo ku nan no ta profeshonal pa por a duna e kuido nesesario, Fundashon Alzheimer Bonaire a konstatá ku nan a duna kuido ekselente na nan sernan stimá durante e último 5 lunanan; di nos parti un kòmplimènt pa nan tur!                                   

Pa e famianan sinembargo ainda no ta bon kla kon e normal nobo lo bai ta: E Pasadianan lo bai funshoná atrobe manera kustumber?                                                

– Nan komo miembro di famia lo ta kapas pa sigui ofresé e sostén i kuido nesesario?

Nan ta haña nan konfrontá ku e inseguridatnan aki, siendo ku nan tur ta deseá lo mehor pa nan famia.

Direktiva di Fundashon Alzheimer Bonaire tin tur komprenshon p’e situashon dje dunadónan di kuido aki.

Maduro & Curiel’s Bank (Bonaire) N.V. ta rekonose e esfuerso partikular dje famianan aki, i ku sostén finansiero di nan parti huntu ku Fundashon Alzheimer Bonaire nan ke organisá un Dia di Famia, “Family Day” pa e persona-nan balente aki.

Komo muestra di gratitut i rekonosementu nan lo ofresé e dunadónan di kuido un programa variá den luna di sèptèmber próksimo, i e Tema lo ta: “Nos no a lubidá boso.”

Via medionan lokal, Fundashon Alzheimer Bonaire ta bai pidi e miembronan di famia ku ta bini na remarke, pa nan registrá pa mas tardá 31 di ougùstùs próksimo via telefon nr +599-7800120 serka nos ‘Case Manager Dementie’, sra Henna Winklaar, ku ta alabes vise-presidente di direktiva.

FAB su deseo ta pa tur miembro di famia ku ta bini na remarke pa partisipá na e “dia di famia” aki registrá, pasobra nan ta meresé esaki.

Share This
error: Content is protected !!