KRALENDIJK – Kampionato 2020-2021 di futbòl di nos isla ta dediká pa di dos bia na s.v. ATC di Tera Kòrá, esaki pa e bon trabou ku e direktiva di e organisashon di futbòl aki a bin ta hasi na bienestar di futbòl di nos isla, di nos hóbennan, di nos futuronan. Kampionato 2019-2020 tabata dediká na e ekipo pero manera ta konosi e kampionato a wòrdu deklará nulo pa motibu di e pandemia di Covid-19.

Esaki e presidente di FFB ku ta nos federashon di futbòl, sr. Ludwig “Luti” Balentin, a duna di konosé den su diskurso na okashon di bendishonamentu di unifòrm pa tur e ekiponan “U” i senior di s.v. ATC, esaki djasabra último den oranan tempran anochi na e kluphùis di e organisashon di futbòl aki di Tera Kòrá.

S.V. ATC.
ATC bou di presidensia di sr. Frensel ”Dicky” Janga ku huntu ku su direktivanan a karga e klup di futbòl aki sigur i mas ku tur kos e futbòl di nos isla. Pa 25 aña sr. Frensel Janga a karga e klup di futbòl aki di Tera Kòrá.
Durante añanan ku a transkurí, s.v. ATC a krea masha masha hopi hungadó mes ku otronan ta drumi wak e desaroyonan pa kita nan bai kuné.
Diferente hungadó di taya awe den nos futbòl, a kuminsá nan karera, siña hunga i desaroyá serka “coach”nan di s.v. ATC.
Maske kuantu hungadó sa pèrdè momentu ku otronan kita nan bai kuné, sèmper e ekipo aki a keda stabil na su partisipashon den kampionatonan di nos isla organisá pa e federashon di futbòl di nos isla ku ta FFB.

Share This
error: Content is protected !!