KRALENDIJK – Ramoncito Booi eks lider di partido polítiko Union Patriótico Boneiru, a papia na Radio Live 99.9 FM. El a papia komo suidadano, sinembargo hopi prekupá. “Hopi tempu a pasa sinembargo bo ta keda tende ku Ramoncito ta den ékis partido i Burney El Hage. Awor ya ta 10 aña ku mi ta pafó di polítika. Algun momentu a pidimi konseho, sinembargo nada mas pa bisa ku mi ta metí den un òf mas partido polítiko. Hopi bia ku algu sosodé den gobernashon, nan ta bisa ku Ramoncito ta tras di e kos. Ami no ta den nada polítiko. E problemanan di ántes di enseñansa, brantwer, salubridat ta kompletamente kambia i mehorá. Meskos ta e kaso ku prison i mas. Gobièrnu di Boneiru tin sèn i asta ta sobra sèn den kaha fin di aña. E asuntu di kamindanan kibra mester atendé esei ku mas rapides. Gezaghèber ta bai atendé ku e parti karetera, esaki bou di su guia debí ku e ta parti di e seguridat. Ta bin un persona for di Hulanda pa bai traha dirèkt den e área pa loke ta trata drechamentu di kamindanan. Mi tin problema kue esaki pasobra pueblo no a vota pa gezaghèber. Ta algu inkorekto ku ta pone diputado i ta gezaghèber ta bai atendé nan tarea, pasobra tin sèn, sinembargo e trabou no ta kana. Esaki ta inkorekto i poko poko otronan for di Hulanda ta penetrá den nos gobernashon. Ta un bèrgwensa e forma ku kos ta bayendo. Falta di vishon pa yega na resultado pa mehorashon di e isla. E asuntu di reunion di konseho insular ta kanando inkorekto. Gobernashon mester di un guia, na unda ta deseá pa bai. Hopi ta papia sinembargo  no tin un direkshon. E asuntu di Master Plan ta bon sinembargo e konsepto no ta korekto. Diferente hende ta pensa na nan mes manera i ta pone esaki huntu pa krea e master Plan. No ta Boneiru a bin ku e asuntu di COVID-19. E asuntu di Master Plan mester warda un ratu kuné, pasobra niun hende sa kon ta bai sigui despues di e pandemia di vírùs. Pues no sa e direkshon pa loke ta trata turismo, aviashon, barku krusero i tur otro aktividat ekonómiko,”Booi a menshoná.

El a sigui bisa:” Mi no ta den niun asuntu di partido polítiko. Ami a skohe pa sali for di polítika. Mi no ta bai hala James Kroon un kantu,  pa ami bira lider di niun partido. Loke mi a hasi a pone ku Boneiru ta sobrebibí bon for di dje awe ku tur e problema nan di ‘corona’ vírùs. Pa e motibu aki mi ta keda ku sentimentu pa Boneiru momentu kos no ta bai bon pa loke ta e parti di gobernashon. Nos di Boneiru mester mantené nos responsabilidat. Tur hende a vota p’ami pa e loke Boneiru tin awor, ban traha. Tempu mi a bai elekshon 10 aña pasá, awe Aruba i Kòrsou ta lamentá ku nan a skohe otro direkshon. Boneiru tabata chikitu i mester a hasi un eskoho. Ami huntu ku pueblo di Boneiru a skohe pa Hulanda i otro nan a skohe pa pafó di Hulanda.  Boneiru ta haña ayudo di Hulanda. Nos ta hañ’é sen mester pidi. Otro islanan ta pidi i no ta haña. Esei ta e bèrdat. Gobernantenan tuma responsabilidat pa kos kana pa Hulanda no tuma kos for di nos,”entre otro Booi a menshoná.

Share This
error: Content is protected !!