KRALENDIJK – Fiskal mayó Bote ter Steege denter di poko ta bandoná Boneiru pa kontinuá ku un tarea nobo aya na Aruba komo prokurador general. Bote ter Steege: ”2 aña i mei a pasa rápido. Mi a yega Boneiru i a sera konosí ku e sistema di trabou i konosé e hendenan, spesial esnan ku mi ta bai forma mi trabou kuné. Boneiru ta un isla bunita ku hopi naturalesa. El a mantené gran parti di su naturalesa. Mi a bin for di un pais i ta un diferensia grandi. Lamentablemente e asuntu di ‘coronavirus’ a presentá i kosnan a kambia. Esaki no solamente na Boneiru, sino mundu kompletu.

Pa loke ta trata e parti kriminalidat, esaki no ta asina alarmante na Boneiru. Boneiru ta hopi sigur, esta hende por konfia ku e ta relativamente seif, sea riba kaya òf na kas. Esei no ta nifiká ku nada no ta pasa òf ta bai pasa. Simplemente e ta sosodé ménos kompará ku otro lugánan. E bon di Boneiru ta ku mayoria hende konosé otro i esei ta yuda pa un bon trabou, sigur pa loke ta trata esun di Polis, gezaghèber, Marechaussee, duana i OM.

Un menor di edat meresé kastigu momentu e aktua inkorekto. Sinembargo mester yud’é pa e no kontinuá den e mal kaminda. Kada bia tin hende nobo ta kai den man di hustisia òf esnan di kustumber ta kontinuá, sinembargo tin ku a stòp di presentá dilanti hues. E ta varia. Pa loke ta trata uso di droga, entre otro mariwana ta keda algu ilegal. Ta notabel mayoria hende ku ta usa mariwana, e ta trankilisá nan. Solamente algun persona ta bira agresivo ku uzo di mariwana. Pa loke ta trata otro tipo di droga no por kompará, manera entre otro cocaina etcetera, ku ta hopi fuerte pa e hende i dañoso pa nan salu,”fiskal mayo ter Steege a bisa.

Labamentu di plaka na Boneiru ta rekerí hopi atenshon. Hopi hende ta purba pa hasi esaki na Boneiru. Ta hopi importante pa buska bon informashon di esnan ku ta inbertí den Boneiru for di eksterior, di unda nan ta haña e mion nan di dòler. Si nan no por splika, esei ta duna un bista kla ku e sèn ku nan tin no ta legal.

Pa loke ta trata e parti di gobernashon na Boneiru, nan tin bia ta  kritiko pa loke ta trata reunionnan di konseho insular. Si nan traha den bon harmonia i huntu ku gezaghèber, sigur esei ta na bienestar di e isla.

Pa loke ta trata e mundu nobo di media sosial, entre otro ‘Facebook’, hende no por menasá otro. Esaki ta un echo kastigabel. Si un persona sinti ku e ta menasá, tuma kontakto ku polis. Na final mi ke bisa ku mi a siña hopi na Boneiru i danki pa tur e kontaktonan ku mi tin. Prensa mester keda kritiko riba polis, ministerio públiko i polítikonan. Tur kos bon pa Boneiru ku e futuro nobo i briante, fiskal mayó ter Steege a bisa.   

Share This
error: Content is protected !!