KRALENDIJK – Awe tardi den kareda di algu promé ku 3’or, den área di saliña na altura di Pink Beach, hendenan a tuma nota kon hos a baha riba laman. Esaki ta un fenómeno di naturalesa ku no hopi bes ta wòrdu mirá na Boneiru i a kapta atenshon di esnan ku tabata na parti sùit di nos isla. E hos a keda algun minüt riba laman i despues a disparsé. 

KONDISHON DI TEMPU

Meteo ta informá ku un ola tropikal situá awe traimèrdia riba parti ost di Laman Karibe ta move den direkshon wèst. E sistema aki por siguí desaroyá durante di próksimo dianan i bira un siklon tropikal. Pa lokual ta trata e kondishon di tempu pa e islanan ABC durante di e próksimo 24 ora: Tiki bientu for di direkshon variá i bastante kalor. Durante oranan di awe tardi te ku djaluna mèrdia ta antisipá un oumento di nubia ku algun yobida kompañá pa welek ku bos. Servisio Meteorológiko Kòrsou lo siguí e desaroyo di e sistema aki hopi di aserka.

Share This
error: Content is protected !!