KRALENDIJK – Radio Live 99.9 FM a papia ku Shurman Kook kende ta pastor i presidente di iglesia Atventista di 7 dia di islanan Aruba Boneiru i Kòrsou. Huntu kuné tabata presente Surrandy Selassa, e presidente di iglesia Atventista di Boneiru. Nan kombersashon ta relatá na e buki ku nan a lansa ku ta karga e nòmber ‘Duna Shon Grandi su Honor’. “Iglesia Atventista mundialmente tur aña ta hasi entrega di buki. E motibu ta pasobra nos di iglesia ta kere ku mas tantu e hende lesa mas e ta siña. Esei ta e kaso e aña aki kaminda a traha un bunita buki pa repartí den komunidat di Boneiru. E deseo ta pa kada famia tin un di e bukinan. Un total di 3000 buki tin pa parti. E kantidat no ta sufisiente pa tur hende na Boneiru, sinembargo esei ta e deseo pa mas tantu posibel un hende haña e buki. 2019 a trese e buki ‘Speransa pe famia di awe’,  i e aña aki ta ‘Duna Shon Grandi su Honor’. 5 aña pasa e tabata ‘Salu i speransa’. Tur aña ta trese un tema dilanti pa inspirá speransa den hende. E situashon ku nos ta pasando aden aktualmente, nos ke haña un palabra di alimentu. E aña aki ta algu spesial. Normalmente ta un persona for di eksterior ta skirbi e buki. 2020 ta un persona di nos mes, un outor di Karibe. E buki ta saka den kuadro di konmemorashon di 225 aña, lucha pa libertat. Esaki a kuminsá na Kenepa na Kòrsou. No solamente algu ku a kuminsá na Kòrsou pa Kòrsou. Ta trata di algu ku tabata sosodé mundialmente. Na 1795 tabatin e revolushon Franses. Esaki a inspirá esun na Haiti. Di Haiti a inspirá e revolushon di esnan sklavisá mas grandi den Karibe Hulandes, ku ta afektá e islanan Aruba, Boneiru i Kòrsou. El a kuminsá na Kòrsou dirigí pa Tula i a afektá den tur e islanan den Karibe Hulandes. Na 1863 momentu Hulanda a duna emansipashon na hendenan sklavisá, tabatin 161 persona sklavisá na Boneiru. Na Aruba tabatin 463 i na Kòrsou 7000. E buki aki ta konstruí theologikamente e mensahe ku e hendenan tabata deseá pa duna e tempu aya. Si tuma nota di mayoria dokumentu skirbi, ta atendé e lucha pa libertat for di perspektiva di hustisia sosial. Siendo un teólogo nos a analis’é for di e teológiko spiritual. Un ehèmpel ta, 19 di ougùstùs 1795 despues di a kuminsá e lucha dia 17, Tula tabatin un kombersashon ku pader Schink. Den e kombersashon e ta puntra pader Schink; Nos tur no a nase di Adam i Eva? Pues e ta rasoná ku e opresor ku nos tur ta igual, pasobra nos tur a bin di e mes un Dios. Esei ta un argumentu teológiko moral anto riba dje nos ta konstruí e mensahe ku tin den e buki. 12 di sèptèmber nos miembronan di iglesia ta bai den barionan pa parti e buki na esnan den komunidat. E buki ta pa disfrutá di speransa loke awendia ta pober,” nan a konta.

Share This
error: Content is protected !!