KRALENDIJK – Nos kampionato di futbòl ku tabata programá pa kuminsá djabièrnè último 28 di ougùstùs 2020, kampionato temporada 2020-2021 di nos isla organisá pa FFB ku ta e federashon di futbòl di nos isla, a para o sea ku esaki a keda posponé sin kuminsá pa medidanan debí na kasonan nobo di Covid-19.

Djabièrnè último, despues ku tur kos tabata práktikamente kla pa e temporada nobo di futbòl ranka sali, debí na un kaso nobo di Covid-19 ku a keda registrá aki riba nos isla, nos promé mandatario primeramente a tuma desishon pa laga kampionato futbòl kuminsá ku un maksimal di 500 fanátiko, ku regla tambe di e distansia sosial i pa loke ta e parti di higiena.

Despues ku a prepará i tur kos práktikamente tabata kla i ku asta e kordinadó di kampionato, sr. Patrick Mariana, a anunsiá esakinan den programa Deporte99 di Radio Live99.9 den oranan di mèrdia, mas despues ta drenta otro informe ku futbòl por tuma lugá si pero sin fanátiko.
Akinan e federashon a tuma desishon ku pa hunga sin fanátiko, a posponé e kampionato te na momentu ku por hunga e kampionado normal ku su fanátikonan.

Esaki ta e situashon aktual i motibu pa kua nos kampionato di futbòl 2020-2021 no a kuminsá djabièrnè último manera planiá.
Nos ta spera sinseramente ku e situashon di Covid-19 aki ku despues di a registrá un di dos kaso den fin di siman, ku e situashon lo normalisá i ta bou di kontròl, pa nos por sigui ku deporte aki riba nos isla, loke nos mester di dje sin mas.

Share This
error: Content is protected !!