KRALENDIJK – Sindikato A.F.B.W. djabièrnè último a honra diferente miembro, kendenan for di prinsipio tabata na lantamentu di e organisashon. E aktividat a tuma lugá na sede di A.F.B.W. den presensia di un grupo limitá di persona. Esaki debí na e medidanan ku mester tene kuenta kuné relashoná ku COVID-19. Presidente aktual di A.F.B.W. Cherel Kwidama a dirigí algun palabra durante e anochi. “Mester di pasado, presente pa por traha riba futuro. Asina e federashon ta bai dilanti. Eric Vlijt i Ewald Abdul entre otro ta esnan huntu ku Rudolfo Statia, a papia hopi ku ami. For di nan mi a risibí hopi informashon tokante A.F.B.W.. Nos ta bai sigui duna rekonosementu na otronan. Mester kuminsá un kaminda i esei a sosodé awor.

Norwin ‘Nochi’ Willem ta yuda inkansabel. E no a funda A.F.B.W.. E ta un simpel sirbidó. Semper e tei pa yuda nos,”tabata entre otro loke Kwidama a bisa. Seguidamente a papia presidente di USIBO Mavis Abrahams “Mi ta orguyoso di ta aki awe. Den un tempu kòrtiku A.F.B.W. a logra reorganisa e sindikato. E ta un ehèmpel pa otronan. Ta importante pa sa bo pasado. Dor di sa bo pasado bo por bai pa futuro. A.F.B.W. a usa un don hopi importante. Den sindikato ta un trabou ku kon bo hasi e tarea, nan ta bati bo kabes manda abou. Pabien i nos ta sigui konta ku boso,”presidente di USIBO a menshoná e anochi. Despues a kontinuá ku entrega di Oorkonde na esnan ku a keda rekonosé. Ewald G. Abdul, Eric M.Vlijt, Primu F. Bernabela, Hermenegildo J. Cicilia, Rudolfo A. Statia i Norwin C. Willem.

Share This
error: Content is protected !!