KRALENDIJK – Situashon di burakunan den kaminda na Boneiru ta bira mas i mas na Boneiru. Si den pasado bo por a hala pa no kai buraku, awendia bo por skohe kua buraku bo ke kai den dje. Esaki ta e tristu realidat! E situashon a bira ‘Abnormaal’! Un situashon doloroso pa outomobilistanan ku ta man na kabes ku e kantidat di sitio, ku ta un molèster pa maneobrá pa kita for di buraku i ku chèns grandi pa kai den otro buraku. Algun outomobilista a pidi Radio Live 99.9 FM pa saka potrèt di algun situashon di buraku den kaminda. Ta trata di e krusada na altura di Mentor pa bai Nort di Saliña i Hanchi Amboina. Naturalmente tin hopi mas karetera ku ta kan kan di buraku. Outomobilistanan ta roga pa gobièrnu i diputado James Kroon pa tuma nota di e situashonnan rònt Boneiru i asumí nan responsabilidat. No por sigui soportá e situashon aktual. Aparte ku e ta kousa kibramentu di tayer i piesanan bou di outo kreando gastu inesesariamente, e ta peligroso pa tráfiko. Tinu i bista di un shofùr ta mas riba kore wak buraku ku wak peaton, baiskel, buriku òf tráfiko ku ta bini den direkshon kontrali. E situashon ta aun mas peligroso na momentu ku awaseru yobe. Kombinashon di potrèt ta papia pa nan mes i ilustrá algun di e kantidat di burakunan ku tin riba vários di kamindanan na Boneiru.

Share This
error: Content is protected !!