KRALENDIJK – Resientemente e konosido suidadano George Thodé, bon konosí pa ‘Kultura’ a papia tokante diferente situashon na Boneiru. Entre otro el a papia tokante Lac. Lac ta un sitio hopi plat i fásilmente laman por subié di un banda baha di otro banda. Kultura: ”Tin un problema notabel ku Lac. Ta trata di un isla. Hopi aña pasa Lac tabata un isla. Segun tempu ta bai el a yena ku santu i a bira parti di Boneiru. Esaki a sosodé debí na mal tempu, esta orkannan ku a pasa kisas riba Boneiru òf hopi serka, a pone ku e área di Lac a yena ku santu i a bira un isla pega na Boneiru. Di e forma aki no mester usa por ehèmpel un boto pa yega na boka di Lac, loke ántes tabata e kaso. Mester tene kuenta ku nivel di laman a kuminsá subi. Momentu di mal tempu e awa ta kana drenta Lac kana bai direkshon di Chaparal. Mester tene kuenta ku e entrada pa Lac por sera i esnan paden no por bai pafó. Tin hopi kombersashon na Kòrsou debí ku diferente sitio, awa ta subi i yena e área.

LAMAN POR LABA LOKE TIN KONSTRUÍ NA SOROBON

Sorobon ta fásil pa laman tape. Un dia esaki ta sosodé. Porta den futuro tin ku drenta e área di Sorobon for di parti pabou, esta den e área di Rancho di Dòi. Kaminda tin e lugánan di windsurf, si un ola grandi bin e ta pasa bai te den e saliña pabou di Rancho di Dòi. Ta bon pa tene kuenta momentu ku awa yena i yega den e área di El Gran Chaparal. Si esei sosodé, sa ku mester kuminsá prepará. Ta kos ferfelu ta na kaminda. E paraiso rònt di Sorobon ta bai disparsé. Kualke mal tempu ku pasa den bisindario di Boneiru, e ta destruí e área. Ántes laman tabata manda kantidat di baranka na kosta sùit. Hopi di e piedranan aki pa konstruí entre otro kura di Hotel Bonaire i kuránan di kas i mas. Mester ta alerta pa momentu ku un situashon asina presentá, nos no lamentá,”Kultura a bisa. Si un hende bai Lac òf Sorobon, i ta sinti algu straño mihó bandoná e sitio. No bai e sitionan aki pasobra laman por subi 30 pa 40 meter sin avisá. Kos fastioso por pasa na Boneiru e añanan binidero. Na Hulanda ya a trata e tópiko aki for di 2005. Rònt mundu ta na altura ku nivel di awa ta sigui subi.

No ta pa spanta niun hende mi ta menshoná esakinan. Simplemente pa e hende ta konsiente,”Kultura a bisa.

Share This
error: Content is protected !!