KRALENDIJK – “Mi ta hopi kontentu kon e situashon ta aktual kompará ku na luna di yanüari ku mi tabata na Boneiru”,Sekretario di Estado Raymont Knops a bisa relashoná ku su bishita di trabou 2 dia na Boneiru. Knops:”Último dos dianan ku mi tim i ami ta na Boneiru nos tabata hopi okupá ku bishita di diferente sitio. Hopi kos a keda ehekutá loke mi ta kontentu kuné. Entre otro nos a papia ku bestuurscollege, miembronan di frakshon di konseho insular. Nos a papia ku e grupo di de ‘Jong professional’ loke ta hopi importante pa nos futuro. Mi a bishita e ‘Voedselbank’ i a tuma nota kon e situashon ta aya. Ta importante pa menshoná ku e voluntarionan aya ta hasiendo un bon trabou. Nos a papia ku Kamer van Koophandel i diferente kompania i nan a menshoná kon kontentu nan ta ku e ayudo ku a risibí relashoná ku e situashon aktual. Ta importante pa sinta analisá konta kontinuá ku futuro di Boneiru despues di e pandemia, pa mantené e bunitesa di e isla. Na Fundashon Mariadal nos a papia tokante e situashon aktual ku e problema di COVID-19 kon nan ta prepará pa kualke situashon ku presentá. Tambe nos tabatin enkuentro ku direktor di STINAPA pa tende di nan kon nan ta mira i pensa pa loke ta trata e parti di naturalesa di e isla”, Sekretario di Estado Knops a bisa.  

El a papia tambe riba pregunta di parti di prensa tokante e situashon di kamindanan ku ta den hopi mal estado Knops:” Sèn ta importante pa bo por hasi trabou di entre otro drecha kaminda. Solamente ku sèn no por hasi nada. Mester di planiashon kon ta bai ehekutá e proyekto pa drecha kamindanan na Boneiru. Awor a kaba di firma pa un persona di Hulanda ku bon konosementu riba e tereno, bin i duna un man na Boneiru den e sekshon pa atendé ku drechamentu di kaminda. Esaki ta perkurá pa ehersé e trabounan mas rápido. Ta notabel ku tin trabou a tuma lugá pa loke ta trata drechamentu di kaminda, sinembargo falta mas pa hasi. Pues por spera un oumentu den trabounan di drechamentu di kaminda i trahamentu di kaminda nobo pronto”.                

Share This
error: Content is protected !!