KRALENDIJK – Tardansa enorme pa drechamentu di kamindanan na Boneiru. Hopi reklamo e forma ku ta drecha kaminda na Boneiru, entre otro e krusada di kaya Carlos A. Nicolaas/kaya Grandi.

Djaweps 2 di yüli 2020 a inisiá e trabounan pa drecha e krusada menshoná, pa despues kontinuá ku kaya Carlos A. Nicolaas den su totalidat. A informá ku e trabou ta bai wòrdu ehekuta den diferente fase mirando ku tin negoshi riba e kaya aki i pa nan no wòrdu perhudiká. E promé fase di e trabounan na e krusada kaya Carlos A. Nicolaas/kaya Grandi, lo mester ta tin un durashon di 2 luna i despues ta sigui mas aleu ku drechamentu di kaya Carlos A. Nicolaas.

Outomobilistanan ku ta trafiká tur parti di Boneiru ta mal kontentu e forma ku e trabounan ta bai. Hopi reklamo den komunidat i riba media sosial e forma ku ta atendé ku kayanan na Boneiru. Djis imaginá si nan logra kaba renobá kaya Carlos A. Nicolaas pa komienso di 2021, esei ta nifiká ku ta tuma 1 aña pa renobá kisas 2 kilometer di kaya. Djis konta kuantu kaminda tin na Boneiru i saka bo sòm kuantu aña ta tuma pa renobá loke tin aktualmente, sin traha kaminda nobo.

No ta falta di e trahadónan di e kompania. Nan ta hasi tur esfuerso. Tin indikashon ku e palabrashon i kordinashon entre e doño di kompania ku ta hasi e trabou i gobièrnu, nan no ta komprondé otro. Aparentemente gobièrnu tampoko no tin un persona pa kontrolá i guia proyektonan. Mester buska mas alternativa pa atendé ku drechamentu i trahamentu di kaminda na Boneiru.

Tin hopi otro manera pa solushoná e asuntu di dura eternidat riba un kaminda. Ta notabel ku no ta studia e trabou bon promé implementé. Ta duna e impreshon ku esnan konserní no tin bon konosementu di e materia. Esaki ta pa Gobièrnu i e kompania. No por ta asina ku ta bisa e trabou ta dura 8 siman i awor e ta leu pa keda kla. 

Sigur kos por pega aki aya i por bai algun dia èkstra di loke a palabra, sinembargo mester tene kuenta ku tin negoshi riba e kaya aki i nan ta wòrdu perhudiká. Esaki ta remarkenan ku ta sirkulá den komunidat, i a pidi pa Radio Live 99.9 FM publik’é.  

Share This
error: Content is protected !!