KRALENDIJK – Ta selebrá dia di Boneiru otro for di e manera kustumbrá. No ta bai tin e parti protokolar solamente pa invitadonan tampoko mas. Diputado Nina den Heyer a splika prensa tokante kon ta bai atendé dia 6 di sèptèmber ku ta dia di Boneiru. “Nos ta den un situashon diferente i gezaghèber di Boneiru i EBT a bini ku algun medida adishonal i mester ahustá e aktividat ku tabata planiá relashoná ku dia di Boneiru. Nos tin diferente regla ku mester kumpli kuné, pa nos por kontinuá ku bida. Selebrashon dia di Boneiru ta un dia importante pa nos. Pa e motibu aki nos ta tene bon kuenta ku e situashon aktual, i no ta organisá nada ku ta perkurá pa aglomerashon di hende. Esaki ta bon pa evitá ku nos ta kai den algu ku nos no por kontrolá i ku tur e konsekuensianan, debí na e kantidat di hende presente. Ya pa algun dia ta hasiendo diferente grabashon i ta sigui e dianan binidero ku mas. Lema ku nos tin pa 2020 ta: Tradishon komo inspirashon pa inovashon.  E aña aki bèrdat nos tin ku buska kosnan inovativo, pa nos keda presentá e kosnan ku tradishonalmente nos ta hasi, entre otro ku selebrashon dia di Boneiru. No por otro, esei no ta kita ku na un manera seif, kada famia na kas ta dòrna no ku kosnan karu i selebrá e dia. Disfrutá di e manera adaptá ku ta bai presentá e grabashonnan. Ku poder di Dios otro aña nos por kontinuá selebrá dia di Boneiru manera nos a kustumbrá, den bario huntu ku pueblo di Boneiru”, diputado den Heyer a bisa. Ya pa algun aña ta pone e selebrashon di dia di Boneiru den un bario, i 2020 tabata planiá pa organisá esaki den bario Tera Kòrá. “E aña aki debí na e situashon di COVID-19, lo no organisá e aktividat den bario. E plan ta pa 2021 kontinuá ku e selebrashon den bario Tera Kòrá. For di awor ta evaluando si ta kontinuá despues di 2021 ku selebrashon dia di Boneiru den bario. Esaki awor ta den kombersashon i momentu esei ta konkreto lo informá pueblo”, diputado den Heyer a bisa.   

Debí na e reglanan vigente relashoná ku COVID-19, komishon organisadó di dia di Boneiru, na diferente momentu mester a adaptá henter e programa, Jeanne-Ann Polly Winklaar presidente di e komishon a bisa. “Dia 6 di sèptèmber ta bai tin solamente pa mitar di nuebe un reunion solèm ku ta tuma lugá den Pasangran i despues ta kontinuá ku e parti protokolar i esun kultural grabá. A hasi grabashon di ámbos menshoná pues no tin nada e mainta na un sitio públikamente. E grabashon ta bai pa medio di ‘Live Streaming’. E grabashon ta kontené: hisamentu di bandera i tokamentu di himno, palabra spiritual di Herbert Domacasse, sigui pa un kansion di alabansa kantá pa Maresa Pieter-Clementina. Diskurso di gezaghèber Edison Rijna i diputado Nina den Heyer. Luigino Molina i Wesley Sint Jago ta presentá dos kantika nobo relashoná ku e dia. 2 persona lo wordu rekonosé riba e dia, esaki ta keda un sorpresa te dia 6 di sèptèmber. Despues di e parti protokolar aki ta kontinuá ku diferente presentashon. Por mira tur kos pa medio di Facebook i televishon”, Winklaar a bisa.  

 

Share This
error: Content is protected !!