KRALENDIJK – Diputado Elvis Tjin Asjoe den kombersashon ku Radio Live 99.9FM a papia tokante Bonaire International Airport. “Momentu ku nos a drenta gobièrnu tabatin un direktor interino na BIA i el a menshoná ku e ta stòp ku e funshon. Gobièrnu a nombra un direktor interino nobo Jos Hillen i a nombra un hunta di komisario nobo. Hillen e direktor nobo a traha rápido riba e parti di drechamentu di e pista na aeropuerto Flamingo. E direktor ta trahando riba un master plan ku ta enserá e parti di pista i terminal. Tin diferente opshon, kon ta bai atendé ku e desaroyo pa loke ta trata aeropuerto BIA. A papia ku Hulanda kon por haña finansiamentu pa e master plan. Tin un hunta di komisario i no ta na gobièrnu pa mete den esaki. Ta nan ta disidí fuera di e direktor interino, ku nan ta nombra un otro mènedjer. Mi a tende ku tin otro mènedjer, sinembargo mi no tin masha detaye. Aeropuerto ta kanando un trayekto di mehorashon. Nos tabatin un reunion ku nan resientemente, pasobra si e situashon keda manera e ta awor, pa fin di aña nan ta bai tin problema finansiero. Nos a bisa nan, no por bati na porta di gobièrnu, pasobra nos mes mester di e sèn ku nos tin. Nos a manda nan pa papai ku ministerio di INW i EZK, pa yuda nan kubri e periodo di COVID-19. E direktor interino a manda pa e tiendanan i a bisa ku ta bai habri e oportunidat pa otro kompanianan, loke ta perhudiká esnan ku ya tei pa hopi aña. E tiendanan aktual tei i mester duna nan e oportunidat pa desaroyá i e kos lokal mester keda den e tienda. Nos no ta deseá un aeropuerto manera Merka, Aruba òf Kòrsou. Nan a tende nos gritu i ta atendiendo pa e tiendanan ku tei mehorá i amplia riba nan produktonan. Pues nan ta bai tin motibu pa keda i amplia nan negoshi. Un bia pa luna mi ta atendé ku e direktor i momentu ku nos reuní lo mi papia kuné riba e CAO ku nan a firma na 2016, i kiko ta bai kontinuá”, diputado Tjin Asjoe a bisa.     

Share This
error: Content is protected !!