KRALENDIJK – “Tradishon komo inspirashon pa inovashon” tabata palabranan di diputado Nina den Heyer den su spich riba dia di Boneiru. “Na momentu ku den komienso di e aña aki nos a bini ku e lema aki pa ku selebrashon di nos dia di Boneiru, nos no por a imaginá nos mes ku nos lo a eksperensiá esaki asina literalmente.

Nos a haña nos ta husa lokual ku semper nos a hasi pa ku e selebrashon di dia di Boneiru komo un base di inspirashon pa na un manera otro tòg duna atenshon na e dia tan importante aki. Nos a haña nos ta inová e selebrashon aki purá.

Tradishon i orígen ta nos base. Inspirashon ta nos kombustibel i inovashon ta e kaminda ku nos ta deseá pa yega. Nos ke ta ehèmpel pa otro islanan den Karibe. Nos ke ta e isla ku tur bishitante ta keda kòrda ku kariño i ta deseá pa regresá. E isla kaminda nan a eksperensiá nos puresa i bunitesa komo isla, sinembargo tambe komo hende.

E isla kaminda nos ta kuminda otro ku un bondia, bontardi òf bonochi. E isla kaminda nos ta traha honestamente pa bai dilanti i esnan ku ta den nesesidat pa mas atenshon ta risibié. E isla kaminda gritu di muchanan alegre ta resaltá for di den barionan. E isla di dushi hende ku ta realisá ku ta huntu so nos por logra kosnan grandi pa Boneiru.

Pa yega aki nos mes mester tin konosementu di nos tradishon, i tambe eksperensiá nos isla. Nos mester tin kurashi i amor propio loke ta resaltá loke ta di nos. Nos mester tin un mente habri pa sigui pa dilanti i ta kreativo. Pa reevaluá di unda nos ta bini, unda nos ta deseá pa yega, kiko ta bai ku nos òf kiko tin ku keda atras. Pa moldia nos tradishon bieu den e spil di tempu.

Nos ta bibando den un temporada ku nos no por fiesta manera nos a kustumbrá. Nos no por move bai pafó di nos isla fásil, i turistanan no por yega nos isla manera tabata e kaso ántes. Ami ta kere fielmente ku nada no ta pasa pòrnada. Kada kos ku sosodé ta pa nos siña algu for di dje.

Kisas nos kreador a pèrmití loke ta pasando awor, pa nos para ketu i wak tur kos ku un otro mira. Pa nos apresiá loke ta di nos, i loke di bèrdat ta importante? Pa nos re-deskubrí komo hende ken nos ta, tambe re-deskubrí nos isla bendishoná?

Laga nos usa e temporada di awor, pa nos di bèrdat mira i disfrutá di nos isla i di nos hendenan. Laga nos apresiá e balor di tin bida, i tin hende ku ta stima nos. I mas ku tur kos, laga nos realisá, ku apesar di tur kos, Boneiru ta un isla bendishoná.

Felis dia di Boneiru i ku Dios sigui bendishoná nos isla”, diputado den Heyer a bisa.

Share This
error: Content is protected !!