KRALENDIJK – Ken por a pensa durante ku tabata selebrá dia di Boneiru na 2019, ku den 2020 mundu ta den gara di un vírùs, ku lo kambia hopi kos, entre otro nos selebrashon, dia di Boneiru. Esaki tabata promé palabranan di Gezaghèber Edison Rijna den su diskurso di dia 6 di sèptèmber 2020. “Mundu ta den gara di un krísis, ku nunka ántes tabata e kaso. Ken por a pensa ku mester tuma medidanan drástiko manera: sera espasio aéreo i di nos haf pa loko ta trata barku di turista, tur esaki pa por kuida salu di nos suidadano.  Si un persona lo a menshoná durante selebrashon di dia di Boneiru 2019 tokante e situashon ku nos ta den awor, lo mi no a keré. Sinembargo manera nan ta bisa na ingles: ‘yes here we are’. Ata nos, mei mei di un krísis sin presidensia for di luna di mart, momentu ku deklará e pandemia global di e malesa COVID-19, kousá pa e vírùs nobo di ‘corona’. Un brote ku a kuminsá for di aña pasa na un pais hopi leu for di Boneiru, i el a krusa henter mundu yega serka nos. Dia di Boneiru ta un dia ku nos ta para ketu i wak kon orguyoso nos ta di nos dushi isla, nos bandera, nos eskudo i himno i nos dushi hendenan. Un dia ku nos ke selebrá nos Boneiru stimá. Awe nos ta selebre den e normal nobo. Esaki ta nifiká ku distansia sosial i pa medio di Internèt. Nos mester a kuminsá kustumbrá ku e sistema nobo for di luna di mart di 2020. Apesar di esaki, meskos ta e kaso ku ami tambe tin e deseo di duna boso un man òf un brasa, i selebrá huntu ku pueblo di Boneiru. Awe mi ta bisa públikamente ku mi ta orguyoso di boso. Mi ta yama tur e dushi suidadano di Boneiru i bishitantenan, hopi danki pa e disiplina ku boso ta duna durante lunanan ku a pasa. Un vírùs no ta transmití su mes, sinembargo ta hende ta perkurá pa esei sosodé. Hende ta transmitié pa medio di kontakto ku otro. Pa e motibu aki ta inmensamente importante, pa tene nos mes na regla i e distansiamentu sosial. Danki na boso tur ku a mantené na e reglanan, loke a perkurá pa e kotagio limitá te awor. Un bes mas mi ta pidi pa mantené e bo mes na e reglanan. Huntu nos ta logra. E medidanan ku nos a tuma ta pa protehá salubridat públiko, loke pa ami ta na promé lugá. E medidanan tabatin impakto fuerte riba e parti sosial i ekonómikamente. Gobièrnu di Boneiru i esun di Reino a mobilisá pa suavisá e impakto sosial ekonómiko menshoná, sinembargo ta konsiente ku e situashon ta di prekupashon. Mas e periodo di medida sigui, e retonan ta oumentá. Pa e motibu aki nos ta papiando ku gremio komersial, pa wak kon por relativá aktivá nos ekonomia na un manera responsabel. Esaki semper teniendo kuenta ku salu di e hende, ku ta e prioridat di nos mas haltu. Krísis no solamente ta trese reto, sinembargo e ta krea tambe oportunidat. Pensa riba inovashonnan inovativo, manera ta bisa ‘out of the box’. Ban huntu pa nos krea un impulso ekonómiko, i surpasá e krísis aktual. Mi ta kontentu di mira partisipashon aktivo, for di diferente gremio den komunidat, banda di hopi sugerensia i idea ku suidadanonan ta aportá. Ku esaki suidadanonan ta demostrá boluntat pa krea su mes futuro. Nos ta pasando den tempu difísil, sinembargo ku disiplina i mente positivo i koperadó ku otro, nos por fria nos mes riba un futuro hopi mas mihó pa nos tur na Boneiru. Mi ta terminá bisando:Nos tur stima nos dushi Boneiru. Mantené disiplina loke ta kada un di nos su responsabilidat. Mantené na e instrukshonnan pa nos protehá nos mes i nos ser kerí i komunidat. Huntu nos por vense. Nos huntu ta Boneiru. Pabien ku dia di Boneiru i ohalá mas pronto posibel nos por selebrá dia di Boneiru, manera semper huntu.

Share This
error: Content is protected !!