KRALENDIJK – E situashon di kareteranan den mal estado na Boneiru ta konosí pa gobièrnu i gezaghèber di Boneiru Edison Rijna. 

“Nos a firma un kombenio i esaki ta nifiká ku munisipionan di Hulanda di Rotterdam ta bai yuda Boneiru den entre otro planifikashon i kordinashon di trabou pa e kosnan kana mas rápido. Sekretario di Estado Raymond Knops a menshoná ku sèn so no ta kaminda. Mester plania i presentá bestèk kon ta bai hasi e trabou. E munisipionan menshoná tin hopi eksperensia i pa e motibu aki nan ta bin Boneiru pa yuda aselerá e proseso pa drecha i traha kaminda na Boneiru. Tin diferente plan trahá, i ta kuestion di algun siman pa inisiá ku trabounan relashoná ku drechamentu di kaminda. No ta bai drecha kaminda ku solamente asfalt. Mi persona a papia tokante otro sistema pa drecha kaminda manera klenku, betòn i e kamindanan di kunuku ku ta di tera por kuminsá drecha esakinan. No ta nesesario pa warda pasobra e kaminda di tera ta drecha esaki fásil. E departamentu di RNO ta esun responsabel pa esaki i e departamentu tin un direktor nobo ta kuminsá ku e funshon promé di òktober binidero. Ta ferwagt ku manera e drenta e funshon e ta kuminsá atendé ku drechamentu di kamindanan di asfalt i esnan di kunuku. Pues denter di algun siman nos outomobilistanan ta bai mira trabou i mehorashon den drechamentu di kaminda di asfalt i esnan di tera”, gezaghèber Rijna a bisa. El a menshoná ku e ta forma parti di un kolegio ehekutivo i nan ta traha den bon harmonia. “Mi tei ta yuda den tur sentido di palabra. No solamente asuntunan di kaminda. Entre otro tambe asuntu di kombustibel, medio ambiente i e parti di haf. E situashon aktual di kamindanan ta di tal forma ku nan ta di atenshon urgente. E parti di seguridat den tráfiko ta den man di gezaghèber i ta na su lugá pa mi persona konhuntamente ku e diputado pa yuda pa e asuntu di drechamentu di kaya”, gezaghèber Rijna a bisa. 

Share This
error: Content is protected !!