KRALENDIJK – Tin un video ta sirkulá tokante un situashon bou di kua un persona na Bonaire ta biba. A usa argumento polítiko i hurídiko, tokante privasidat di e persona. Tur ta hipokresia. Hasimentu di redu, papia i saka stelashi di hende no ta kontra privasidat? Esaki suidadano Arthur Sealy ta puntra su mes den un komunikado resientemente. E video a i ta mustra e bèrdat sunú ora ta papia di pobresa. Mi ta spera ku ta bini mas video ya partidonan polítiko ta kuminsá enfatisá derecho humano.

Tin mas kaso di e situashonnan aki, pero unda e yudansa ta? Ta awor numa a tuma nota di e situashon aki? Awor ta kore hasi kos? Unda e kasnan sosial ta? Ta saka pòtrèt sí ora di duna pakete i no ta tene kuenta ku privasidat. Esaki no ta nada otro ku hasi polítika riba lomba di hende den nesesidat. Ki dia ta saka pòtrèt kaminda ta duna yabi di kas na unu ku tin aña ta biba den un situashon deplorabel? Fundashon Cas Boneriano ta broma ku ta bai traha un mion di kas, pero no pa e pobernan i gobièrnu no tin nada di bisa. Mester tin un inventario di tur e kasnan den mal kondishon ku ta abitá.

Dia seis di sèptèmber un grupo selektá ta bai selebrá dia di Bonaire ku ta: E pèrla den Karibe, E splendor den Karibe. E isla di pòstwesel. E isla di Chogogo. E paraiso pa sambuyadónan. E isla mas den Hulanda, E isla di hende kontentu sperando den Dios i Hulanda. E isla ku e mihó “Bestuursakkoord”. E isla ku e mihó Rapòrt Crm Link. E isla ku e mihó isla pa para den Saliña Vlijt. E isla ku e mihó Master Plan na mundu. E isla ku ekonomia blou. E isla ku e mihó kareteranan den Karibe. E isla ku e mihó Konseho Insular. E isla ku e mihó kuido pa hendenan pober. E isla mihó protehá kontra Covid-19. E isla ku e mihó Galileo Sensorstation. E isla orguyoso di su bankonan di kuminda. E isla ku pa CFT ta esun ku tur kos ta na òrdu. Nada di keha.

Meskos ku a para, fiesta, enkuentronan deportivo i eventonan kultural lo ta un gran muestra di solidaridat si para e festin den kurá di Kolegio Ehekutivo. Ami ta kontentu di a nase, biba i traha na Bonaire i ta mi responsabilidat komo siudadano ku derecho di voto pa kuestioná gobernashon. Mirando ku Konseho Insular no ta hasié.

Share This
error: Content is protected !!