KRALENDIJK – Den e simannan tras di lomba e sindikatonan AFBW i FEDEBON a konfrontá diferente kaso kaminda ta retirá trahadónan for di trabou. Un banda e retiro aki ta basá riba petishon di e dunadó di trabou pa disolvé kontrakto laboral. Den e kasonan aki AFBW, FEDEBON huntu ku USIBO i tambe riba konseho di e konsehero hurídiko a logra pa yega na akuerdonan mutuo di terminashon di trabou kaminda a paga e trahadó un kompensashon hustu pa su añanan di servisio. Por menshoná ku en todo kaso a logra paga mas ku e sesantia ku legalmente e trahadó tin derecho riba dje. Ku esaki a bolbe keda demonstrá e importansia pa e trahadó ta miembro di un sindikato. Ku esei semper e trahadó por konta riba sosten i asistensia di su sindikato pa asina logra lo mihó pe den kualkier situashon na su boka di trabou. Un pabien ta na su lugá pa AFBW, FEDEBON i USIBO pa e forma kon nan a sali na defensa di e trahadónan menshoná.

Na BOPEC tabatin un kaso di retiro inmediato di un trahadó ku a laborá 38 aña na e kompania. E motibunan pa a retirá e trahadó tabatin di haber ku e posishon fuerte ku e trahadó aki, siendo un shopsteward di FEDEBON a tuma den henter e situashon di BOPEC ku manera ta konosí ta den un situashon ya pa mas ku 2 aña kaba di inseguridat. USIBO i FEDEBON a duna e trahadó asistensia hurídiko i a bai un huisio sumario pa destrui e desishon di retiro inmediato i pone e trahadó bèk na trabou den su funshon i sigui paga esaki te ora yega na un terminashon legal. Korte a duna sentensia djabièrnè ultimo i a destruí e retiro i ordená BOPEC pa pone e trahadó inmediatamente den su funshon bèk i sigui pagé su salario for di 20 di yüli(dia ku a retiré den un forma inmediato). I pa kada dia ku BOPEC nenga di kumpli lo mester paga un multa di USD.200 pa dia o parti di dia te ku un máksimo di USd.10.000.

Ora nos a kere ku BOPEC lo kumpli ku e veredikto di korte komo un bon dunadó di trabou, e trahadó a risibi un informashon ku e no mester presentá na trabou ya ku BOPEC a entregá un petishon na korte pa awor disolvé e kontrakto di trabou. Ku esaki BOPEC a demonstrá di ta inhumano i asosial. Miéntras nan ta kulpa Estados Unidos di ta inhumano, ilegal i a-sosial nan ta praktiká e mesun maneho di kapitalismo salvaje’. Pues kueste loke kueste mester retirá e trahadó pa asina demonstrá poder i alabes intimidá i menasá sobrá trahadónan di BOPEC. USIBO kier hasi un yamada na tur trahadó di BOPEC, esta labor i staf pa para duru i uní pasobra nos lucha huntu pa tene BOPEC habrí ta totalmente hustifiká i legítimo. I si nos para huntu nos lo kanta viktoria na final. Dikon nos ta hasi e yamada aki. Esaki ta pasobra ya BOPEC su gerensia a anunsiá ki direkshon nan kier bai ku tur trahadó di BOPEC. Aki tambe un palabra di felisitashon na FEDEBON, USIBO i nan hurista mr. Hose Figaroa pa e forma fuerte i dokumentá ku nan a defendé e trahadó den e Huisio Sumario. I ku e mesun determinashon nos lo duna asistensia na e shopsteward ora su kaso di disolvé su kontrakt di trabou presentá den Korte. I aki tambe nos ta konvensí ku Hustisia lo triunfá riba mala fe

Share This
error: Content is protected !!