KRALENDIJK – Presensia di Sekretario di Estado Raymond Knops a bai sin mashá beheit. Mi tin un remarke ku ta e siguiente, si ta tene konferensia di prensa e lugá apropiá ta sala di Konseho Insular. Propaganda pa un lugá privá ta “uit den boze”. Bisando esei mi ke trata e firmamentu ku a tuma lugá tokante e koperashon ku munisipio Rotterdam i munisipio Alphen aan de Rijn. E punto di salida ta e Akuerdo di Atministrashon. Knops den un karta, fechá 14 di òktober 2019, na presidente di Eerste Kamer a skirbi ku inisio di ehekushon di e proyekto di drecha kaya ta programá pa novèmber 2019 i ku OLB a sera un kombenio ku munisipio Rotterdam i munisipio Alphen aan de Rijn. E pregunta ta. Dikon Bonaire ta kasi un aña lat ku firmamentu? Unda e aklarashon a keda? Ken ta saka mentira? Knops òf Kolegio Ehekutivo? Trabou di preparashon tabata bou di enkargo di R&O. Dikon e no a sosodé segun e planifikashon? Mènedger di programa a raportá esaki? Mi no ta kere ku tur kos mester kana segun e tempu stipulá, pero komo gobièrnu e obligashon ta pa responsabilisá e tardansa. Si mira e agènda di ehekushon tin 11 punto ku 4 kolumna. Unu di aktividat, unu di ehekushon i akshon di parti di Bonaire, unu ku ehekushon i akshon na enkargo di Gobièrnu hulandes i fecha di inisio. Ta deber di Kolegio Ehekutivo pa duna di konosé kiko a resultá di tur loke ku mester a tuma lugá entre desèmber 2018 i desèmber 2019. No tira falta riba Covid -19 ku a presentá na mart 2020. Si ke tira falta hasié ku; Elekshon di mart 2019, kombinashon UPB/FSP den e promé kuartal di 2019, Koalishon MPB/UPB ku a kuminsá den e promé kuartal di 2019, Destinashon Blou i Plan Maestro. Awor ta ora di praktiká transparensia.

Share This
error: Content is protected !!