KRALENDIJK – Tin hopi malkontentu ta reina relashoná ku number di telefon ku a pone disponibel pa yama si bo tin kualke síntoma relatá na Covid-19. Ta trata aki di e number di telefon 0800-0800. Klientenan di e provedor UTS no por drenta den kontakto ku esnan konserní, pa medio di e number di telefon ya menshoná. Pues e hendenan ku tin number di telefon di e kompania KLA i Digicel so por yama e number sin problema. Ounke den nan kaso e situashon tambe ta fastioso komo ku nan ta yama sinembargo niun hende ta kontesta.

Si no haña kontesta mesora, gobièrnu di Boneiru ta pidi pa yama despues un biaha mas òf purba yama ku un telefòn fiho. Sinembargo e ta un situashon fastioso pa drenta den kontakto ku esnan ku ta atendé ku e telefon. Di e manera aki e ta kousa desgusto den komunidat, pa hendenan ku tin síntoma di posibel ‘corona’ vírùs por bai tèst.

Riba pregunta tokante e kontakto di telefon pa medio di e number 0800-0800, Marian Luinstra-Passchier kende ta sostené GGD, a bisa ku OLB tampoko no ta konforme e manera kon e number di ‘call-center’ ta funshoná. “Ta bèrdat ku tin un situashon tékniko ku no ta funshoná optimal. Sinembargo mi ta konfirmá ku e number ta funshoná i por hasi uzo di e number pa drenta den kontakto ku esnan konserní. Por ta bèrdat ku sierto momentu tur liña ta okupá i e kontakto no ta pasa na e momentu ei. Ta bon pa esnan ku ta bèl e number sigui yama pa drenta den kontakto ku e hendenan”, Luinstra-Passechier a bisa. Pues ta hopi importante pa e number funshoná i ta spera atendé mas pronto posibel, suidadanonan ta pidi.  

Share This
error: Content is protected !!