KRALENDIJK – Bo ke? Bo por! No duda! Ku e lema akí FORMA ta habri e siman di alfabetisashon, poniendo atenshon na e tema analfabetismo funshonal. Ku e meta pa konsientisá i motivá komunidat kompleto pa sigui sostené i kolaborá ku FORMA pa kombatí analfabetismo na Boneiru.

Un persona ku por lesa i skibi sufisiente pa atendé tur su kosnan diario hopi biaha no por imaginá kiko ta nifiká pa un hende ku no por lesa i skibi sufisiente. Imaginá ku bo ta habri bo buzon di karta i no sa ta kiko tin skibí den e karta di banko. Imaginá ku bo ta haña remedi i yega kas bo no ta kòrda kiko e yùfrou a spliká bo di e remedi i bo no por lesa loke tin skibí riba e kaha. Imaginá ku bo ta yega un kaminda i tin instrukshon skibí i niun hende ku t’ei pa splika kiko bo por hasi.

Esaki ta pasa ku 22 % di adultonan tur dia (Stichting Lezen en Schrijven Bonaire 2015), ku ta mas di 2000 adulto na Boneiru. Awendia mayoria informashon i komunikashon ta skibí. Esaki mas i mas ta bira informashon digitalisá i ta pone ku bida pa e analfabeta funshonal ta birando dia pa dia mas difísil. Mas i mas e analfabeta funshonal ta keda isolá i no por partisipá den nos komunidat. Esaki ta duna strès, frustrashon i sintimentu negativo serka e persona ku no por lesa i skibi.

Pa mas ku 12 aña FORMA ta trahando intensivo pa por logra programanan di formashon aktual i atraktivo pa e adulto analfabeta funshonal siña lesa i skibi i desaroyá abilidat ku ta importante pa por funshoná independiente den nos komunidat. E programanan ofresé durante e añanan ku a pasa a demostrá di ta efektivo pa e (hóben) adulto analfabeta funshonal. No ta trata solamente programa di siña lesa, skibi i kalkulá, pero tambe entre otro abilidat sosial, abilidat digital, manehá sèn i reibeweis.

For di 2012 FORMA a kuminsá ku diferente kampaña di konsientisashon pa medio di videonan di promoshon, testimonio di embahadornan di alfabetisashon, dunando training na profeshonalnan i trahando riba kolaborashon ku mas partnernan sosial na Boneiru.

Sifranan ta indiká ku programanan di alfabetisashon i formashon ta keda importante pa e hóben adulto i adulto ku no a haña e oportunidat òf pa kualke motibu mester a stòp di bai skol. Sifranan CBS 2018, statline-Caribisch Nederland ta indiká ku den e edat di 25-35 aña 43% tin un formashon mínimo.

Den e trabou diario ku e analfabeta funshonal, e departamentu di alfabetisashon ta mira e desaroyo di kada kliente i e impakto positivo p’e persona i su famia. Alabes kolaborando huntu ku diferente instansia i partnernan sosial FORMA ta spera di por logra mas servisio i informashon na midí pa e personanan ku no por lesa i skibi sufisiente.

FORMA tin diferente kursonan pa personanan analfabeta funshonal i tambe adultonan ku no a logra kaba skol sekundario.

Pa mas informashon por tuma kontakto ku Fundashon FORMA na 717-6949 òf pasa na FORMA su lokalidat nobo na MG Shoppingmall den sentro di suidat.

‘Bo ke? Bo por! No duda!’

Share This
error: Content is protected !!