KRALENDIJK Hóbennan na Hulanda Karibense ku lanta den pobresa, mayoria di biaha ta kai den un sírkulo visioso di problema. Por ehèmpel na hopi okashon hóbennan tin eskases na alimento saludabel i ta kore un riesgo mas grandi di haña nan mes den situashonnan kaminda tin violensia doméstiko i abusu. Pa kibra e sírkulo visioso akí ta nesesario pa atendé ku e pobresa ku ta reina bou di e hóbennan akí mas lihé ku ta posibel. Ta hopi importante pa tantu Rijksoverheid komo e entidatnan públiko traha huntu riba esaki. Esaki ta loke Nationale ombudsman i ombudsman pa mucha ta rekomendá den nan rapòrt ‘Ta relevante unda bo kuna a para’

Reinier van Zutphen di Onbudsman a papia tokante rapòrt pa loke ta trata hóbennan ku nan a atendé ku ta tópiko di dia. “Tin un diferensia entre un hóben ku a nase na Boneiru, e situashon ta diferente for di esun ku a nase na Venezuela. Meskos ta e kaso pa esun ku a nase na Amsterdam. E oportunidat ku e hóbennan ta haña ta varia, sinembargo no mester ta asina ku sierto hóben no tin e oportunidat pa logra. Esnan ku tin difikultat simplemente mester di mas atenshon pa nan logra. Nos a papia ku un kantidat enorme di hende, spesialmente e hóbennan. Tin problema pa loke ta trata di lugá di biba pa esnan ku ta studia, finansieramente, pobresa i mas. Nos a pone tur kos riba papel pa asina tin un bista kon e situashon ta. Ta notabel ku e mes un problema ta ripití. Pues un hóben ku ta pober no por studia i si e no studia e no ta haña trabou. Si bo no traha bo no tin sèn i sin e sèn bo no ta yega na un bibienda. Mester kibra e sirkulo, loke ta meta di e rapòrt ku nos a traha. Nos a trese 4 tópiko for di e rapòrt. Tin nesesidat pa hóbennan tin oportunidat pa nan por biba riba nan mes. Hopi di nan ta bibando serka mama i tata. Hopi hende ta biba huntu, pa motibu finansiero. Hürmentu di lugá pa e hóben bai biba ta asina haltu ku e no ta pagabel pa nan. Mester yega na un forma kisas algu manera un ‘campus’, pa e hóben por biba aden. Otro problema ta ku tin hopi muhé hóben ku tin difikultat pa por hiba nan yu un krèsh, debí ku tin skarsedat di akohida pa mucha. Nan tin ku keda sin bai traha pa por wak e yuna kas. Si bo ta un mama hóben ta hopi difísil si bo ta deseá pa kontinuá ku skol. Si bo bai skol bo ta pèrdè e ònderstant i no por perkurá pa e yu. Di e manera aki no ta kontinuá ku skol. Mester bin un fin na e situashon aki. Tin hóben ku ta deseá pa bai studia na Hulanda, debí ku aya tin loke nan ta deseá pa studia, sinembargo nan no ta bin na remarke pa beka, debí ku nan no tin 18 aña. Esaki ta konta pa hóbennan di Boneiru, Saba i Sint Eustatius. E kantidat di hóben ku e nesesidat menshoná ta hopi. Sierto momentu nan ta obligá pa hasi algu ku nan no ta deseá, pasobra no tin otro alternativa.  

Sírkulo visioso di pobresa 

Otro kos ta ku ta sosodé, tin hopi mucha ku mainta ta bai skol sin kome. No tin pan na kas. Hopi no tin sufisiente sèn pa nan kome. Na Boneiru ta hopi karu pa por biba. Un kònkòmber ta kosta 2.49 dòler i dia tras dia ta bira mas karu. Kompará ku Hulanda na Boneiru ta karisimo pa por biba. E entrada ta hopi abou. Pues si bo ta traha bo ta gana tiki sèn i komestibel ta karu. Pues e hende no por kome salú. Un hende ta tuma desishon pa biba den un kas di hür, sinembargo e no por kome salú. Esaki ta loke ta bini hopi dilanti”, van Zutphen a bisa.  

Margrite Kalverboer, Ombudsvrouw pa mucha: ‘Hóbennan ku lanta den pobresa hopi bia no ta eksperensiá un problema so, sino un skala di problema riba diferente tereno. Nan ta haña nan den un patronchi di ripitishon ku ta sigui di generashon pa generashon. Ta importante pa kibra esaki.’

Komo konsekuensha di pobresa, e hóbennan aki hopi bia tin falta di kuminda salú. Banda di esaki e strès, ku e bida den pobresa ta trese, por kondusí na e echo ku mayornan ta ménos kapabel pa kria nan yunan bon. E riesgo riba violensia doméstiko i maltrato di mucha ta bira mas grandi. I esei por kondusí na problema mental. Mas aleu pobresa tin un impakto riba e oportunidatnan di desaroyo pa hóben, pasobra pobresa ta kompañá pa bibienda mas malu i ménos partisipashon na aktividatnan sosial. Pobresa hopi bia ke men ku e muchanan ta kuminsá skol ku un atraso kaba, loke ta pone nan kore un riesgo mas grandi di kita skol sin diploma. Asina ta bira mas difísil pa haña un trabou ku sufisiente entrada. E atrasonan ku e hóbennan ta haña den diferente área kasi nan no por alkansá mas. E konsekuensha di esaki hopi bia ta ku, ora nan mes haña yu, nan ta pasa e pobresa i e falta di oportunidat pa e siguiente generashon.

Share This
error: Content is protected !!