KRALENDIJK – Un suidadano di bario Amboina ta hopi desapuntá ku kanalnan kobá den e bario, i no a wordu será bèk korektamente.

“Komo habitante di Amboina prekupá, mi ta trese dilanti públikamente loke no ta korekto den e bario pa loke ta trata kobamentu di kanal i sera nan bèk. Sigur ya pa 2 aña òf mas TELBO N.V. tabatin e proyekto den Bario Amboina, kaminda a koba pa pasa instalashon di faiber na tur kas. Sinembargo te dia di awe, mayoria kanal ku ta krusa duars den kaminda, a keda tapa ku tera i no asfalt òf betòn. Nos komo habitante ta fadá di kore dal nos outo den kada un di e kanalnan ku ta yená ku tera. Mayoria di nan e tera a sak, òf áwaseru a laba e tera bai kuné. Si un persona ta deseá pa bai Sentro di Bario Amboina òf ta biba den e área pega ku e Sentro di Bario, e no por skohe pa pasa banda di buraku. Awor sí ta di mas! Nos ta hasi yamada na TELBO òf Gobièrnu di Bonaire pa nan departamentu konserní atendé ku e situashon. TELBO òf otro kompanianan ku haña pèrmit pa koba riba karetera públiko, no mester laga esaki den e estado manera a hañ’é? Asina ta koba rònt Boneiru i bai laga burakunan habri. Mi ta spera pronto nan duna atenshon na e situashon den bario Amboina”, e suidadano a bisa. 

Share This
error: Content is protected !!