KRALENDIJK – Radio Live 99.9 FM a papia ku lider polítiko di partido MPB, Elvis Tjin Asjoe, tokante un deklarashon ku Daisy Coffie, miembro di konseho insular pa e partido a emití.

”Bèrdat nos a tuma nota di e karta ku Daisy, kende ta miembro di konseho insular pa partido MPB a skirbi. Mi persona a risibí e karta via di prensa. Nos frakshon a aserka direktiva di partido algun siman tras di lomba, i nos a deliberá huntu ku frakshon riba e punto. Frakshon a tuma un liña di kana, ku a kulminá den kambio di lider di frakshon. Nos a palabra ku na momentu ku Daisy Coffie regresá for di eksterior, ta papia kuné riba e loke partido ta pensa. Esei ta loke a sosodé. Nos a bai na kas di Coffie e siman aki, i a partisipá n’e, e liña di pensamentu di direktiva huntu ku frakshon.

Coffie a splika nos ku e no ta di akuerdo ku e pensamentu. E desishon ta netamente relashoná ku salu di Coffie, kaminda ku durante 1 aña el a pasa un temporada turbulento ku su salú, i nos di partido ta preferá pa mihó e no ehersé e liderazgo di frakshon, pa dun’é tur tempu pa e rekuperá. Ta trata di un malesa ku por ta hopi traishonero. Pa e motibu aki komo partido nos a pone den un karta pa entrega na Coffie. Ta un proseso delikado ku a kana stap pa stap i duna Coffie e oportunidat pa a duna su punto di bista, sinembargo finalmente partido a tuma esaki komo salú di hende ta na promé lugá.  

Tur siman mi tabatin kontakto ku Coffie i otronan konstantemente tabatin kontakto ku Coffie. Partido MPB a yuda Coffie tur momentu.  

Coffie a bisa e no ta di akuerdo ku e karta, sinembargo partido ta tuma na kuenta ku mester karga responsabilidat riba petishon di frakshon pa por tin un funshonamentu di parti di frakshon na un manera efektivo, i na promé lugá salú di Coffie ku ta na promé lugá. Ta bon pa menshoná ku un malesa traishonero i e strès ku tin den konseho insular, loke ta hopi, e no ta responsabel pa laga un persona tabatin un temporada ku difikultat ku su salú. Na diferente okashon nos a pidi Coffie pa entrega su tarea di konseho insular. Pues no ta algu ku diripiente a presentá n’e. Djaluna binidero partido tin un reunion plania i ta invitá Coffie pa ta presente pa papia tokante e asuntu aki”, diputado Tjin Asjoe a bisa.

Share This
error: Content is protected !!