KRALENDIJK – Arkeólogo Konrad Antczak ta na Boneiru spesialmente pa hasi investigashon na Klein Bonaire. Huntu ku Papito Thomas di SKAL nan tabata na Radio Live 99.9 FM pa papia tokante e trabou ku Konrad Antczak a bin ehersé na Boneiru. Antczak ta Venesolano establesé na Barcelona Spaña, i ta hasi diferente investigashon.   

Papito Thomas a menshoná ku na 2019 SKAL tabatin un persona ku a bin kore stazje, Oliviere, kende tabata ruman mas grandi di Antczak. Pa medio di Oliviere nos na Boneiru a drenta den kontakto ku e famia, kende vários di nan ta arkeólogo. Tur ta hasi e trabou di investigashon na diferente parti di mundu. A hasi investigashon na Aruba Boneiru i Kòrsou. Siglonan pasá hopi kos a sosodé den e region aki, Thomas a bisa.  

Antczak a menshoná ku e tin tres siman na Boneiru i e ta hasiendo entre otro investigashon riba Klein Boneiru. “Boneiru tin hopi kos pa loke ta trata historia. 2016 mi tabata aki pa algu chikitu. Aña pasa mi a bolbe bin Boneiru i awor mi konosé poko mas mihó. 7 Bia nos a bai Klien Bonaire durante e tres siman aki. Un investigashon den solo kayente riba e pida isla. Nos a haña hopi artefakto, entre otro bala di kayon kuchara i mas. E bala di kayon ta duna indikashon ku barkunan tabata bin Boneiru pa kontrabanda i esnan riba Klein Bonaire tabata purba protehá e isla di Boneiru. Tin hopi mas. Mi ta kurioso pa hasi mas investigashon”, entre otro arkeólogo Antczak bisa.     

Na final di e entrevista Thomas a menshoná ku e famia aki por deskubrí kosnan ku tin na Klein Bonaire i Boneiru i dokumentá tur informashon loke ta hopi importante. Lo dura algun luna pa  por trese dilanti informashon di nos pasado aktualmente deskubrí. Awor Antczak ta sigui pa Kòrsou, pa aya e hasi investigashon importante ku por yega na informashon di relashon entre isla di Boneiru i Kòrsou. Tin hopi informashon i ta importante pa e hende pasa na Museo serka nos pa asina tuma nota di entre otro nos pasado.  

Share This
error: Content is protected !!