KRALENDIJK – E klup di futbòl di Antriòl Pariba ku ta s.v. Uruguay/Titans, pronto tin su tereno pa konstruí su kluphùis i ku su mes fèlt di futbòl.
Esaki e tesorero, sra. Emeray Martha, a bisa den entrevista ku nos redaktor deportivo, Ibi Piar, e siman aki. Esaki a bini komo kontesta riba pregunta di sr. Ibi Piar, ku huntu ku esaki a hasi diferente otro preguntanan mas di kua tur e kontestanan tabata afirmativo.

Sra. Emeray Martha a bisa ku falta masha poko, te asina leu ku ta na nan konosementu, pa logra keda kla ku e tereno.
Ta konosí ku futbòl a lanta kabes formal riba nos isla último añanan aki i ta den un desaroyo positivo ku hopi timnan hubenil den e diferente kategorianan “U”.

E desaroyo ta enorme i mester di mas fèlt di futbòl pa tur e ekiponan por trein. Si s.v. Uruguay logra su mes fèlt pa su ekiponan trein ariba, esaki sigur ta un bon desaroyo ya ku no solamente nan so lo por hasi uso di esaki, sino tur otro ekipo di Boneiru por hasi uso di e fèlt.

Esaki lo no keda solamente na fèlt di bala, pero tambe lo konstruí nan kluphùis unda nan lo por reuní i tene nan otro aktividatnan pa nan miembronan, entre otro reunion i otro enkuentronan sosial.
Si ta bon, no falta muchu pa logra keda kla ku e tereno. Si nos a komprondé bon, esaki lo bini no muchu leu for di Fèlt Elion Flores na Amboina. Momentu ku t’asina leu, nos lo informabo di e desaroyonan den tal direkshon.

Keda pendiente pues ya ku nos lo sigui e desaroyonan hopi pero hopi djaserka..

Share This
error: Content is protected !!