KRALENDIJK – Suzanne Suzy Thodé, Lider di URB resientemente a emití un komunikado tresiendo su prekupashon dilanti di lokenan ta sosodé den sala di konseho insular.

”Último ei tabata tin un mal komprondementu den seno di e partido polítiko ku tin e mayoria di representante den konseho insular. Pa ami komo un lider polítiko, mi ta haña ku un persona ku ta gaña asina aki riba otronan I pa di 3 biaha kaba ta un persona hopi peligroso pa laga e sigui okupá kualke funshon vital den polítika I gobernashon di nos isla. Mi a skucha kon e ta papia den media I pa 4 ora despues resultá ku lokenan ku el a papia den media tabata mentira. No por, bo no por ta gaña riba un dama asina, bo no por ta gaña riba un konsehal asina, bo no por ta gaña riba un lider di frakshon asina anto pa kolmo e dama aki ta representá bo mes partido. Pa ami, mirando ku no ta promé biaha i pa evitá ku aktonan negativo asina aki ta ripití, moshon di deskonfiansa mester wòrdu pasá per dirèkt, tantu na konseho insular komo na e sobra di e BC kompletu paso zwijgen is toestemmen. No a sobra nada otro paso es mas, ta asta un lider di un partido polítiko. E partido polítiko konserní tambe mester buska un manera ku e persona aki promé ku ta aun mas lat.

Anto gezag, si bo ta bolbe laga un komportashon i aktitut I inprofeshonalismo asina aki pasa bai anto sigur ta kuminsá kuestioná bo persona tambe paso ku un supuesto profeshonalismo di e nivel aki, kon un gezaghebber asina aki por ta un persona responsabel mas pa konfia pa ta para na kabes di kualke organisashon òf komo tata di pueblo? Bo no mag ni bo no por ta partidista I zwijgen is toestemmen, pues si tur hende a keda ketu, ta paso tur hende ta di akuerdo ku tin gañamentu anto na un nivel bastante bago asina aki ta tumando lugá den un konseho insular i su BC. E situashon ku a presentá atrobe aki no ta algu normal ni no por konsider’é komo algu normal hamas I nunka, ni tampoko por permití’e bira e normal nobo. Pues p’esei moshon di deskonfiansa ta nesesario pa hinter e tim, evitá aun mas korupshon, esaki ta mi humilde opinion.

Despues di algun mal eksperensia presensiando reunionnan di konseho insular, mi a disidí di stòp di bai reunionnan di konseho insular. Segun tempu tabata bai, mi a evaluá I ripara ku tabata parse manera ku e reunionnan di konseho insular a kuminsá subi di nivel, pues mi a disidí ku na sèptèmber 2020 mi lo bolbe kuminsá presensia reunionnan di konseho insular. Asina a resultá ku djamars promé (1) di sèptèmber mi a presensia atrobe un reunion di konseho insular. Honestamente mi a sali ku sintimentunan miksto for di e reunion aki, si mi sigui bai òf no pero teniendo na kuenta ku ta e reunion di mas importante di Boneiru su polítika I gobernashon, mi a disidí ku mi lo sigui bai tòg.

Lastimamente ku FB di OLB no a publiká mas ku lo tin reunion su djamars despues ku tabata 8 di sèptèmber ni tampoko su siguiente djamars ku tabata 15 di sèptèmber.

Ku un inmenso asombro mi a sinta wak algun parti di e último reunion di konseho insular kaminda ku tabata tin komportashonnan, laga mi yama nan emoshonal ku asta un tiki medio falta di rèspèt pa ku pueblo di Boneiru a bini dilanti. Na mi konsepto, tur e asuntu a start pa motibu di preguntanan aklaratorio nesesario tokante un persona ku supuestamente lo tin 4 funshon den e gobernashon aktual. Awèl esta un bèrgwensa nashonal I internashonal pa nos Boneiru, tantu korupshon den elekshon pa yega na poder pa e resultado bergonsoso aki? Turesten, ainda no a duna ningun kontesta satisfaktorio riba e preguntanan aklaratorio aki pues a buta un komedia dramátiko pa evitá ku pueblo ta haña sa ta kiko eksaktamente ta pasando. Tiki tiki pero sigur ta bira un hecho ku bèrdat ta plaka, puesto I poder ta manda I dirigí nos gobernantenan, sigur riba e parti di djis ser un ser humano honesto, sinsero I profeshonal den trabou ku ta pueblo a duna.

Pa kaba korona e obra, ta saka un konsehal lider di frakshon pafó di Pasangran, ta mas ku 1 konsehal tabata fout pero ta saka 1 konsehal so pafó, pues aki atrobe e parti di partidista ta bini dilanti. Akaso ta kere ku nos tur ta siegu? Tantu schorsing komo sakamentu di hende pafó ta pruebanan ku un persona no ta kapasitá ni no por dil ku problemanan profeshonalmente. Den e bida aki ora tin problema, nos no ta laga hende grita manera nan kier ni saka hende pafó, nos ta resolvé e problema profeshonalmente paso mester sigui huntu sea kua of ken ke of laga di ke. Kabesnan tin ku baha pa traha huntu paso ta pueblo ta sentral, no ta gezag, no ta gobièrnu ni no ta Hulanda, TA PUEBLO TA SENTRAL.

Pueblo tambe mester komprondé ku hecho ta I ta keda si, ku si bo a bai guera ku un ehérsito di sòldánan ku tabata parse bon+ pero bosnan a pèrdè e guera, despues di 4 aña, ta kon bo ta bolbe bai guera ku e mesun ehérsito di sòldánan aki? Nan a prueba kaba ku nan no por bai ni 1 guera te pa nan bai esun di 2, pues outomátikamente bo sa tambe kaba ku bo ta bai pèrdè e guera aki aun mas mahos ku esun promé.

Tambe ta un hecho ku si bo ke yega un kaminda ku nunka ainda bo a yega, bo mester kana hinteramente un otro kaminda ku bo a kustumbrá di kana, si no ta e mesun sirkulo visioso bo ta keda kai I drai den dje I tempu ta bai laga bo, bida ta bai laga bo. No ta un tristesa? Esakinan ta realidatnan di bida, no ta nada inventá pa ningun hende.

Pero atrobe zwijgen is toestemmen i wak kiko ta pasando den hinter un konseho insular, pueblo ta pa esaki bo a vota? Paso si ta pa esaki bo a vota, oké, mi por komprondé ku bo ta ketu, pero si no ta pa esaki bo a vota, dikon bo ta ketu? A duna algun persona e poder di representá pueblo pa medio di trabounan, funshonnan I tareanan sumamente importante pa kumpli kuné I asta salarionan bunita nan ta haña komo rekompensa tambe, no ta kumpliendo ku tur e eksigensianan konserní pero si ta kobra tur fin di luna anto ainda ta riska pone kara di Boneiru na bèrgwensa tambe den un simpel reunion di konseho insular, dus bosnan no por ni reuní tampoko? Bosnan no por traha huntu tampoko? Bosnan no por sinta huntu manera hende na tinu I yega na desishonnan importante pa futuro di pueblo di Boneiru tampoko?

Pero pueblo ta ketu, o sea, ta pa esaki mes pueblo a vota? Tempu ta bayendo rápido, leinan aun mas intolerante ta pasando ketu bai tras di porta, nos ta bai hasi 10 aña den un struktura estatal konfuso i korupto I si pueblo sigui sinta lur asina aki… Ta Oswin Chin Behilia su kantika di Zikinza so a keda pa sinta lur I kanta: pueblo sigui balia, sigui gosa, sigui drumi, no prekupá bo ku mi, e trein ta sigui kore, si bo no bati bèl, e ta hiba bo un kaminda ku abo no ta tèl…

Na hulandes nan ta bisa bo kla i raspá: Een gewaarschuwd mens, telt voor twee…

KÒRDA A TAHA…

Suzanne Suzy Thodé, Lider di URB

Share This
error: Content is protected !!