WILLEMSTAD – Ku informashon optené pa komienso di luna di sèptèmber por konfirmá ku la Niña a bira un realidat. Esaki por dedusí for di opservashonnan registrá di e temperatura di laman relativamente friu na kosta di Perú i e parti ost tropikal di Oséano Pasífiko.

E fenómeno La Nina meskos ku El Niño ta parti di un fenómeno klimatológiko den e parti tropikal di Oséano Pasífiko ku ta impakta vários lugá rònt Mundu. Alrededor di kada 5 pa 7 aña e temperatura di e superfisie di laman den e área aki ta bira relativamente mas kalor (ta karga nòmber di el Niño) òf mas friu (la Niña). Riba e área di temperatura relativamente kalor áreanan di mal tempu ku tòpnan hopi haltu den atmósfera lo wòrdu generá. Esaki lo kondusí na kambio di bientu na nivel haltu den e atmósfera den diferente áreanan na Mundu.

Manera ta konosí den un aña un El Niño kambio di bientunan na nivel den Karibe i Osean Atlántiko ta stroba sistemanan desaroyo durante di e temporada di Orkan. Di otro banda durante di un aña di la Niña bientu nan na nivel haltu ta ménos fuerte den nos region i sistemanan por desaroyá mas rápido den Karibe i den Osean Atlántiko. Pa e motibu aki a pronostiká ku 2020 lo bai bira un aña aktivo pa e temporada di orkan.

Estudio realisá na Servisio Meteorológiko ta indiká ku durante di un la Niña e temporada di áwaseru (òktober te ku yanüari e siguiente aña) tambe lo tin mas probabilidat pa ta mas ku normal debí na e kondishonnan favorabel di atmósfera. Pues ta kalkulá ku e probabilidat pa temporada aki ta alrededor di 60-80% pa un temporada mas ku normal ku alrededor di 400 -530 mm total. Esaki ta 10-40 % mas ku un temporada promedio (366 mm).

Share This
error: Content is protected !!