KRALENDIJK – Larry Alexander Thomas, un tremendo persona di e bario nort di Saliña a bai sosegá den brasa di señor. Larry Thomas djarason 23 di sèptèmber den oranan trempan di mainta a sera su wowonan pa semper. El a bringa te na final ku su malesa pa keda serka nos, pero señor a disidi otro.

Un bon hende di bèrdat. Personalmente mi ta bisa esaki, sinembargo ta hopi hende ta komentá den komunidat, ku e ta un persona trankil, sinembargo ku kurason grandi pa hende. Un persona semper alegre, habri pa yuda tur hende, entre otro na su trabou na Belastingdienst. Semper ku mi top’é, e ta kla pa yuda. E tabata e kara di e ofisina i apropiá pa e funshon ku e tabatin na bali. No pa bisa awor ku e no tei mas. Mi ta sigur ku e tabata na altura ku e ta un persona apropiá pa e posishon ku e tabatin na su trabou. Hopi bia ta sosodé ku un hende su trabou ta pa atendé ku kliente. Keremi no na Boneiru so, sinembargo ta sosodé ku e hende no tin loke nan ta bisa, karisma pa atendé ku hende, den e kaso aki kliente. Un persona manera Larry Thomas, ta nifiká hopi pa un negoshi. Bèrdat tin un dicho ta bisa: ‘De klant is koning’. Sinembargo si kara di bo negoshi no ta apresiá pa ‘klant’, lo no tin ‘klant’ te pa e ta ‘koning’.

Larry Thomas a bai i e mester ta ehèmpel pa nos ku a keda atras, pa siña for di dje. No ta fásil kambia un hende su manera di pensa i aktua. Mi sa tende hende bisa ora nan ta na ofisina di belasting, nan ta skohe semper pa Larry Thomas atendé ku nan asuntunan. Ta notabel riba facebook kuantu reakshon tin tokante su persona. Tur ta ekspresá e bon hende ku e tabata. Tica Nicolaas a skirbi entre otro riba facebook: “No ta tur ora presentá na Belastingdienst ta un bishita agradabel, sinembargo Larry semper tabata sa di akomodá kada un hende ku nan problema spesífiko. Ningun problema pa abo ku a akudí na Belastingdienst, tabata un problema pa Larry. Su manera trankil i su sonrisa ku nunka ta kita for di su kara, tabata trankilisá e hende. Ku pasenshi ekstraordinario e tabata duna splikashon den detaye, unda bo mester ta i kiko bo tin ku hasi. E tabata saka dokumentu ku bo mester for di den kòmpiuter p’abo, i si mester di ayudo pa yena nan, e tabata splika. Esei tabata Larry pa mi. ”  

Sigur e ta hasi falta i doló den famia. Semper mi a top’é òf mester a hasi algu na ofisina di belasting, e ta habri ku amor pa yuda. Mi tin hopi luna sin topa kuné. Konforme boluntat di Dios nos ta aseptá su despedida di tera pa shelu den Reino di Dios. Forsa na su mama Hendrina, Tata Yubi, ruman nan i demas famia, koleganan i konosínan i ku bon Dios yena e lugá bashí di nos amigu.

Share This
error: Content is protected !!