KRALENDIJK – Nolly Oleana direktor di OCW a bisa ku skolnan a tuma diferente medida di prekoushon relashoná ku COVID-19. “E medidanan ta pa evitá ku e vírùs ta plama serka alumno i personal na skol. Den klas nan tin labamano, i ta pidi tur hende labaman ku habon. Den tur klas tin ‘hand sanitizer’, i ta limpia e klasnan ku regularidat. Pa evitá si akaso e vírùs ta presente na skol i sigui plama, a rekomendá skolnan pa habri bentana pa ventilashon. E parti di higiena serka dosente, nan ta hasi uso di e ‘face shield’ òf tapa boka. Durante lès ta pone atenshon na e tópiko di e vírùs. Esaki pa motibu ku hopi mucha ta hiba informashon pa nan mayor. Ta evitá aglomerashon di muchanan. Si e mucha tin síntoma relatá na e  vírùs, e tin ku keda kas i yama dòkter. Ta tuma tur medida relashoná ku e persona ku tin síntoma, entre otro komunikashon ku esnan konserní. Si e situashon sigui oumentá pa loke ta trata e vírùs riba Boneiru, ta hasi uso di enseñansa for di distansia. Esaki lo tin konsekuensia riba kalidat di enseñansa i mas retraso. Esaki lo nifiká ku ta bai tin hopi trabou pa rekuperá e retraso”, Oleana direktor di OCW a bisa.  

Share This
error: Content is protected !!