KRALENDIJK – Segun historiadó Arthur Sealy den un komunikado pa prensa, tin un minoria na Bonaire ku ta haña e informashon tokante Covid-19 konfuso. E propósito ta, evitá Covid-19.

Mi no ta dòkter, ni kurandero, ni biólogo ni epidemiólogo pero si historiadó ku a studia basta dokumento sientífiko tokante kiko a pasa ku e indjannan ku a bini den kontakto ku e Europeonan despues di 1492. Tur kos ta drai rondó di nos defensa kontra malesa. Tin kos ku nos tur sa pero redondamente ta ninga hasi.

Mundu médiko ta traha duru pa yega na un bakuna, pero no spera ku dentro di poko esaki ta sosodé. Tur aña hende ta haña grip i no tin bakuna pa kaba ku grip. Si ke evitá Covid-19, nos tin ku yuda nos kurpa defendé su mes. Bo por hasi e siguiente preguntanan. E medidanan ta duna bo strès? Komo ku bo no tin sigur di trabou i entrada, bo no por sali bai happy hour i bo tin miedu? Strès ta baha defensa di bo kurpa. Bo por puntra bo dòkter. Bo ta biba ku naturalesa? Si bo no ta move, no ta hasi ehersisio, abo i bo yu(nan) no ta drumi entre 6 pa 8 ora pa dia, defensa di bo kurpa ta baha. Bo ta kome salú? Berdura, fruta (apel, mango,drùif), baha di peso, ménos suku, ménos limonada, alkohòl, bebe te, awa. Ta yuda hisa resistensia.

Bo mes òf bo yu(nan) ta gordo di mas? Kome malu ta baha defensa di bo kurpa. Papia ku un dietista. Bo tin sufisiente vitamina A,C ku D? Lus di solo ta bon pa vitamina D, apelsina, awa di lamunchi sin suku, nivel di vitamina A (Zink) ta yuda kontra infekshon. Vitamina D ta importante pa nos grandinan ku ta henter dia den kas. Bo higiena ta ok? Laba man ku habon, keda kas ora bo ta malu, no aglomerá i tene distansia ta medidanan ku semper a usa den tempu di epidemia.

Lesa historia. Bo ta bisti tapa boka pa show, manera karnaval tin òf pa prevenshon? Ta ridíkulo mira hende ta kana den aire liber ku tapa boka bistí òf un shofùr so den outo tin tapa boka bistí. Tapa boka henter dia bistí por kousa; doló di kabes, stroba halamentu di rosea, subi preshon, inflamá bo kueru i bo por kai flou. Pues sea kouteloso ku tapa boka di ménos ku un dòler. Tuma konseho serka bo dòkter. No ta e vírus ta e plaga pero nos komo hende ta e plaga.

Share This
error: Content is protected !!