KRALENDIJK – Awe djamars mainta a desinfektá ofisina di dòkter Michael Hermelijn relashoná ku e kaso kaminda e dòkter a keda infektá ku coronavírùs.

Bonaire Medical Clinic, e ofisina di dòkter Hermelijn na Kaya Libertador Simon Bolivar 12 ta habri bèk djarason 30 di sèptèmber pa duna servisio na pueblo di Boneiru. E kompania ‘Global Detailing Services, Desinfectie Services’ (GDS) a hasi e trabou di desinfektá e edifisio paden i pafó. No solamente e edifisio, sinembargo nan a spùit e kurá ku e edifisio ta aden ku e produkto ku ta eliminá e vírùs.

Aparte di esnan ku ta spùit pa eliminá e posibel vírùs den e ofisina, tin hende ta pasa paña i laba tur loke tin den e ofisina. E meta ta, ku tur seguridat e ofisina ta liber di posibel coronavírùs. Ya tin mas ku 2 siman a pasa, pues sientifikamente mirá, ya e vírùs no ta presente.

Mayan djarason mainta e ofisina ta habri i pashèntnan di dòkter Hermelijn por pasa serka dòkter Simon Eijsenga ku ta e médiko ku a tuma na su enkargo tur konsulta i pashènt. Solamente 3 persona por ta den e ofisina pendiente di e momentu pa drenta den e kantor serka dòkter Eijsenga. Tambe tur pashènt mester usa tapa boka i tene distansia sosial di 1,5 meter. Konsulta ta segun sita telefóniko (bo no por kana drenta si no tin sita). Por pidi resèpt solamente via telefòn òf via Whatsapp na number +599 795 7171

Tin trabou di ahustashon ku a tuma lugá paden di e ofisina, esaki pa por atendé ku hende mas mihó den e situashon aktual. Ofisina di Dr. Hermelijn lo ta habrí di djaluna pa djabièrnè di 8’or di mainta pa 1’or di mèrdia. Atardi di 2’or pa 5’or.

Dòkter Hermelijn, te ainda ta bou di kuido médiko avansá i a wòrdu transportá pa Kòrsou. Nos ta spera riba un pronto rekuperashon di nos Dr. Michael Hermelijn i ku e por regresá bek na su ofisina di kuido médiko pa su pashèntnan.

Riba potrèt awe mainta momentu e hendenan di GDS tabata hasiendo trabounan pa desinfektá ofisina di dòkter Hermelijn.  

Share This
error: Content is protected !!