KRALENDIJK – Sindikato di Maestronan Boneriano (SIMABO) ta hopi disididu. Nan ta haña ku mester sera skol den kuadro di medida di prevenshon di coronavirus. E otro sindikato ku tambe ta defendé personal den sektor di enseñansa ABVO, ainda no a tuma un desishon klave.

Saliendo for di e posishon ku USIBO a tuma den e punto anterior nos kier trese un ehèmpel di esaki pa loke ta trata e sektor di enseñansa. Na promé lugá USIBO a konsultá ku e dos sindikatonan ku ta representá e maestronan i e otro personal den enseñansa, esta ABVO i SIMABO. Tur dos ounke ainda no a bin huntu ta riba e mesun liña di pensamentu, ya ku tur dos a risibí e mesun kehonan for di e huki di mayornan, maestronan, personal i alumnonan den enseñansa. Miéntras tantu SIMABO a tuma un posishon fuerte pa sera skolnan, ABVO ta den deliberashon interno pa nan tambe yega na fiha un posishon.

SIMABO a formulá un idea i kier kompartí esaki ku komunidat. E ta algu tékniko pero ta ilustrá ku tumamentu di medida mester tin un base fuerte di lógika i funshonal. Nos ta sali for di dos dato, esta grandura averahe di e klasnan na e skolnan di SGB i e average di kantidat di alumnonan den e klasnan. Esaki ta grandura averahe ta 80 m2 i e kantidat averahe ta 30 alumno. Si bo dividí 80 dor di 30 bo ta yega na un sifra di 2.5 meter kuadrá di espasio pa kada mucha. Nos no a konta e gangnan mei mei di e reinan, ni e mesa dilanti di kada mucha, e mesa di e dosente i eventual kashinan den e klasnan. Na di dos lugá mester wak e rendimentu den un situashon asina. Di akuerdo ku e sindikato e rendimentu ta hopi abou. Na di tres lugá e klima pedagógiko no ta optimal, pues esaki tambe ta afektá e rendimentu.

Konklushon ta ku ta imposibel den un situashon asina pa tene i mantené e distansia sosial ku e konsekuensia ku transmishon di e virus ta evidente den tur forma. Un siutashon ideal lo ta ku den e mesun grandura bo ta aloká 15 alumno ku tin e ora ei un espasio di 5 meter kuadrá pa kada alumno.

E solushon ku e sindikato ta proponé ta pa forma un tim di krisis den e skol ku lo por aportá na un manera kreativo pa tene skol habrí, kontinuá ku dunamentu di enseñansa elimando e peliger di kontagia ku netamente e medida kier logra a base di e konseho médiko. Aki nos ta mira kon un di e puntonan di salida di USIBO por funshoná, esta di “ E ehekushon di e medidanan mester keda un responsabilidat di esnan pa kua e medida ta ser tumá “.

E punto di salida aki na nos opinion mester por konta pa tur sektor. Un tienda o un pakus o hasta un empresa grandi ta kalkulá su superfisio(e tabèl aki por enkargá servisio di asuntunan ekonómiko pa diseñé) i a base di e grandura di e superfisio ta determiná kuantu hende pareu na e mesun tempu por ta den e establesimento. E responsabilidat pa mantené na e regla aki ta den man di e doño di e empresa. Direktorado di Mantenshon i Supervishon i polis ta enkargá ku e kòntròl i ta mara sankshonan na e violashon. Asina aki USIBO ta di opinion ku henter nos komunidat(alomenos e gran mayoria) ta komprondé e meta di e medidanan, nan ta lógiko, nan ta sirbi e meta, i nan ta laga espasio pa kada ken karga su responsabilidat pa kontribuí pa evitá ku Covid 19 ta plama riba nos isla. Ban ta den esaki un ehèmpel. Nos ta un pueblo di un kondukta di tur parti di mundu gabá.

Share This
error: Content is protected !!