KRALENDIJK – E siman aki a instalá e kamerinnan nobo pa timnan i rèfrinan den Stadion Antonio Trenidad na Rincon. Pa basta tempu e kondishon di e kamerinnan aktual den e stadion ta laga hopi di deseá.

Esaki tabata motibu pa FFB ku ta e federashon di futbòl di nos isla, pa invertí den 3 konteiner komo kamerin pa stadion di Rincon, Stadion Antonio Trenidad, mirando ku e kamerinnan aktualmente ta den mal estado. Dos di e konteinernan lo bira kamerin pa e ekiponan i unu pa e rèfrinan. E konteinernan ta na Boneiru i e kompania enkargá ku esaki a kaba harma unu kuminsamentu di e siman aki.

Djaluna atardi 4’or, miembronan di direktiva di FFB a bai tira bista riba esakinan.

FFB a ofresé oportunidat pa por a mira esaki i saka potrèt pa asina informá pueblo di e trabounan ku ta tumando lugá di parti FFB, apesar ku futbòl ta temporalmente no aktivo pa e motibunan konosí di Covid-19.
Netamente e momentunan aki FFB ta hasi uso máksimo di esaki pa kaba atendé e partinan organisatorio e preparativo pa futbòl Boneriano.
Otro proyektonan ku ta na kaminda ta e materialnan pa futbòl hubenil i tambe preparashon pa e terenonan di yerba artifisial ku tin ku bini.
Esakinan di akuerdo ku sra. Jehan Pourier-Martis, “ programma medewerker” pa FFB.

Riba potrètnan momentu ku e presidente di FFB, sr. Ludwig “Luti” Balentin a bai pone su mes na altura di e kamerinnan nobo ku a yega Boneiru pa Stadion Antonio Trenidad na Rincon.

Share This
error: Content is protected !!