KRALENDIJK – Entrante 30 di sèptèmber, ta ahustá e medidanan ku a tuma 10 dia pasá, i awor e nobo ta bai te ku 31 di òktober 2020.  

Gezaghèber Edison Rijna a tene un enkuentro ku prensa i komunidat ayera, i a papia tokante e medidanan ku resientemente a keda apliká. “Ta notabel ku e vírùs a plama riba Boneiru den esfera privá, na kas i trabou. Pa loke ta trata den pakus i sektor turístiko, a konstatá tiki kaso di kontagio. Corona Virus Disease (CoViD-19) tei i e ta keda sigur pa awor pa dilanti. Nos tin un ordenansa di emergensia nobo ku ta bálido di 30 di sèptèmber pa 31 di òktober 2020. Durante e temporada ku e medidanan nobo di awor, si surgi algu i mester hasi kambio, ta hasi esaki na e momentu nesesario.  

Aki ta sigui e reglanan nobo: Tur pakus por habri siguiendo regla estrikto di higiena. Pakus por sera na nan ora normal, no mas tarda ku 8’or di anochi. Tur establesementu di horeka por habri, esta lugánan di kome i bebe. Mester tene kuenta ku higiena i lugá di sinta figo, 50 porshento di kapasidat, registrashon di tur bishitante i chekeo médiko vokal na entrada di e sitio. Negoshi di horeka por sera mas tarda 10’or di anochi. Kápsalòn, barberia i hasidó di uña, por ehersé nan trabou, i ta obligá pa bisti tapa boka. Mester tene bon na kuenta e parti di higiena i registrá tur kliente. Esnan ku no kumpli por tin konsekuensia ku ta sera e negoshi pa algun dia.

Debí ku diferente kontagio a tuma lugá na trabou, tin algun regla nobo pa esaki. Traha na kas esaki ta obligatorio kaminda ta posibel. Kaminda no ta posibel mester apliká regla di higiena mas tantu posibel. Gym i lugánan pa praktiká deporte ta keda sera. Por praktiká deporte na airu liber sin públiko. Deporte ku hende tin kontakto ku otro minimal ta posibel. Tin eksepshon pa muchanan ku tin te ku 17 aña.          

E muchanan di 17 aña òf ménos por praktiká deporte den kompleho deportivo. Casino ta keda será. Ofisina ku ta bende number si por kontinuá ku benta. Skol i krèsh ta keda habrí. Kasamentu i entiero por tuma lugá, ku un máksimo di 10 persona. Akohida pa hendenan di edat avansá por keda habri, i tur hende mester tene nan mes na e reglanan di CoViD-19, stipulá pa e departamentu di salubridat públiko. Niun evento no por tuma lugá. Por tin enkuentro ku un máksimo di 10 persona, teniendo nan mes na e reglanan stipulá pa entre otro higiena. Servisio religioso por tuma lugá ku un máksimo di 50 persona, teniendo kuenta ku distansia sosial i no por kanta. Transporte públiko i esun ku tin palabrashon pa transporte, mester tene nan mes estriktamente na e reglanan stipulá pa e departamentu di salubridat públiko. Si no por tene e distansia di un meter i mei, tapa boka ta obligá.

Semanalmente Boneiru ta sigui evaluá si por hasi petishon pa kita kódigo oraño i bai bek kódigo hel, pa hendenan ku ta biaha for di Hulanda. E kondishon di un tèst PCR ku a sali negativo 72 ora promé ku buelo, ta keda na vigor pa evitá ku na momentu ku yega Boneiru ta bai den karentena. E reglanan aki ta bai ta un poko alivio pa algun habitante i empresario. Mi ta realisá ku tin hopi prekupashon den komunidat, loke mi ta komprondé pa nan. Sigur pa loke ta trata nos muchanan, hende di edat i esnan vulnerabel den komunidat. Mi ta konsiente di e prekupashon di hopi hende ku ta reina pa loke ta trata asuntu di skolnan.

E chèns pa kontagio tuma lugá na skol ta hopi chikitu. Skolnan ta tene nan mes hopi estrikto na e reglanan di higiena i distansia sosial. Esaki no ta nifiká ku e mucha no por pega ku e vírùs. Kontagio nan ku tabatin serka mucha a tuma lugá na kas i no na skol. Esaki ta un di e motibunan ku nos ta haña pa laga skol keda habrí. Ta importante pa muchanan haña edukashon i evitá retraso den enseñansa. Ta importante pa e ta den esfera sosial ku otro muchanan. Den e tempu aki ta importante pa kuida nos mes i esnan rondó di nos. Pone atenshon na otro i yuda kaminda ta nesesario. E kos mas importante pa evitá kontagio di Corona vírùs ta: tene distansia di por lo ménos 1 meter i mei for di otro, laba man i keda kas mas tantu posibel. Si bo tin keho, yama 0800-0800.  ‘Corona Smart’ nos por logr’é huntu. Tur informashon aktual por haña nan riba: www.bonairecrisis.com.  

Share This
error: Content is protected !!