KRALENDIJK – Awe djarason alrededor di 8.50 di anochi, sentral di polis a risibi notifikashon di un kaso di tiramentu na un kas na kaya Orinoco den bario di Tera Kòrá.

Na yegada di e promé unidat polisial a bin enkontrá ku dos persona heridá na e adrès. For di un investigashon preliminar na e sitio por a komprondé ku 3 tipo deskonosí, ful na pretu bistí, ku kapuchon riba kabes i arma di kandela den man a sorprendé esnan presente na e kas. Un dama i un hòmber a keda heridá. E hòmber a keda heridá na su man mientras e dama tambe a keda heridá despues ku bala di un arma di kandela a alkansé. Despues di nan akto, e 3 tiponan aki a hui bai na pia den e mondi den serkania di e kas i bai pèrdè. Ta sospechá ku tabata tin un vehíkulo mas leu pará tabata warda nan pa hui mesora. E víktimanan a keda transportá ku ambulans pa hòspital pa tratamentu médiko. Outoridatnan polisial tabata tin un buskedá grandi den e mondi i den e bario di Tera Kòrá, pero no a bin topa ku e sospechosonan. Reshèrshinan ta den ful swing ku e investigashon i tin sierto pistanan kaba ta ken ta esnan ku ta envolví i a hasi nan mes kulpabel pa e kaso di tiroteo aki.

E kaso ta sigi bou di investigashon.

Share This
error: Content is protected !!