KRALENDIJK – Ruwella Marinus a manda un karta pa Radio Live 99.9 FM, relashoná ku loke a sosodé ayera anochi den kaya Kamari den bario Tera Kòrá. “Ku esaki mi ke trese un deklarashon di otro banda di medaya di loke a sosodé ayera anochi. Ayera anochi den kaya Kamari den bario Tera Kòrá, a sosodé algu kompletamente diferente di loke a keda publiká den medionan di prensa. Nos a yega kas i drenta kura, i na e momentu ei, tabatin algun persona na e besiña di nos su kas. Ya pa hopi tempu nan tin problema ku nos. Nan tin un teima ku mi partner i ami. E problema a inisiá, debí ku un di nan a menasa di kibra winshil di nos outo. Loke mi ke deklará: niun momentu no tabatin bringamentu, tampoko menasa ku kuchú. Polisnan a presentá na bòshi, komo si fuera ta un kriminal nan a bin buska. Solamente nan a detené mi partner. Mi no por komprondé dikon nan no a detené esun ku a menasa mi partner, i tabata ke a kibra winshil di nos outo? Polis a tuma deklarashon di un banda so, i a nenga di tuma esun dimi. Mi ke sa unda mi derecho a keda? Dikon polisnan no a skuchami? Esaki ta loke realmente a sosodé den kaya Kamari. Ta trata di interkambio di palabra, esta pleitamentu. Niun momentu tabatin bringamentu, tampoko menasa ku kuchú”, Ruwella Marinus a skirbi den su karta pa Radio Live 99.9 FM.          

Share This
error: Content is protected !!