KRALENDIJK – Dòkter di kas Palomino C. di 61 aña a presentá dilanti hues djárason 30 di sèptèmber 2020 den Korte den Promé Instansia aki na Boneiru pa motibu di akto kontra di moral ku un pashènt di 18 aña. Abogado mr. Marije Vaders a representá e akusado via konferensia di video. Ministerio Públiko ta akusa e dòkter en kuestion di a mishi i sunchi su pashènt kontra di su boluntat.

Djarason 17 di mei 2017, e dòkter a palabrá ku e víktima di 18 aña e tempu ei pa topa otro i huntu nan a kore bai un sitio skondí. Aki e akusado a sunchi i mishi ku e víktima.

E víktima tabata kore stazje serka e dòkter na su práktika. E akusado a deklará ku pa algun tempu tabatin spekulashon na trabou i el a aserká e víktima pa puntre si e ta interesá den dje komo pareha skondí. I despues nan a palabrá pa topa pafó di e práktika pa un momentu romántiko.
E akusado a deklará den korte ku el a sunchi e víktima, pero nada mas. El a nenga tur e akusashon di akto no apropiá.

Loke ku a hala atenshon den e kaso aki ta e echo ku e víktima a hasi denunsia despues di masomenos 9 luna. Fiskal Blanco a bisa ku esaki ta pa motibu ku e víktima tabata hopi impreshoná pa e akto aki i despues di sosten di personanan rondo di dje, el a tuma e kurashi pa entregá keho.

E dòkter a keda kondená na un kastigu di prizòn kondishonal di 4 luna ku un periodo di prueba di 3 aña i 240 ora di trabou di tarea. Na promé instante e dòkter tabata di opinion ku pafó di konsulta si lo tabata posibel pa sunchi su pashènt, pero despues e la bin realisá ku e la violá normanan étiko i sosial. Hues a enfatisá ku aktonan manera esaki ora ta trata di un relashon di dòkter ku pashènt semper ta kastigabel, fuera di ofisina tambe. Fiskal a demandá alabes pa e dòkter no praktiká su trabou pa 2 aña pero mirando e echonan, hues a konsiderá esaki fuera di proporshon. E víktima i su abogado mr. Olga Kostrzewsky tabata presente via konferensia di video. Su demanda pa daño perhuisio pa gran parti a keda otorgá.

Share This
error: Content is protected !!