KRALENDIJK – E aña aki manera ya nos a trese na publisidat, nos Regata 53 no por tuma lugá debí na e Pandemia di Covid-19.

Aquaspeed Bonaire Windsurfers a haña e enkargo pa organisá esaki, pero lamentablemente e situashon di Covid-19 a para tur kos.

Nos a papia ku sra. Licetha Saragoza, presidente di Stichting Aquaspeed Bonaire Windsurfers tokante esaki.

Sra. Saragoza den entrevista a duna di konosé ku na e momentunan aki tur kos ta práktikamente “on hold”.

Nan a haña e invitashon di Indebon ku ta e instituto di deporte di Gobièrnu di Boneiru, pa hasi Regata 53 pa loke ta e parti laman manera a kustumbrá kuné di parti Aquaspeed Bonaire Windsurfers.

Enbèrdat nan a kuminsá hasi tur e preparashonnan nesesario, tur e partinan logístika tabata kla pa ranka sali ku Regata 53.

Pero lástimamente Covid-19 no a pèrmití esei.

Lo tin ku sinta bèk ku Gobièrnu di Boneiru i Indebon pa kuminsá fokùs riba e parti Regata 2021.

Tur eseinan ta pendiente, fechanan ainda ta pendiente i ta premirá ku esei ta nan deseo, lo sinta huntu pues pa yega na un “kontrakt di kuido” pa realisá esei.

Riba nos pregunta sra. Saragoza a duna di konosé ku Regata 53 tabata planiá manera kustumber ku ta e di dos siman di e luna aki, pa ta mas eksakto di 13 pa 17 di òktober 2020.

Nan tabatin esaki partí di den dos, di kua lo a kuminsá ku e parti di windsurfing ku lo a move dos dia pa Sorobon, esaki pa por a haña e windsurfistanan bèk den e parti di Regata, tambe e muchanan ya ku esaki lo a bai ta hopi riba e parti lokal.

E regata tabata internashonal pero komo ku Covid-19 no ta pèrmití, loke a trese kuné ku a fokùs mas tantu riba e nivel lokal.

Pa a haña e windsurfistanan bèk, teniendo kuenta ku e muchanan mas chikitu, a bini ku e idea pa organisá dos dia di windsurf pa nan so na Sorobon i despues e regata ta move bèk bin Playa 15 pa 17 ku ta djaweps, djabièrnè i djasabra, esaki ku kompetensia di tur e otro kategorianan di beleristanan entre otro yatenan, “mirco boats”, sunfish ku tur eseinan.

Riba nos pregunta si a nota ku tabatin interes pa Regata 53, sra. Saragoza a duna di konosé ku na momentu ku a kuminsá, a tuma nota ku e interes tabata asina grandi, a purba hasi’é mas chikitu pa tene kuenta ku e parti di distansia sosial, pa evitá aglomerashon pa akitividatnan ku lo a bai organisá, tur eseinan a purba tene afó komo aktividat i fokùs mas tantu riba kompetensia riba laman.

E parti di partisipashon, e interes tabata asina grandi pa kua a keda purba te na último te na momentu ku a tende di gobièrnu pa kanselá e aktividat.

Nos a puntra sra. Licetha Saragoza di Aquaspeed Bonaire Windsurfers, teniendo kuenta ku ya nan ta preparando pa otro aña, si tin un fecha kaba pa regata di otro aña?

Sra. Saragoza a bisa ku ainda no tin un fecha pa otro aña.

Lo tin ku sinta ku gobièrnu di Boneiru pa huntu mira kiko lo por hasi ku e fecha.

Lo tin ku tene kuenta ku si Aruba i Kòrsou, mirando e echo ku nan fakansi di skol no ta kai meskos ku Boneiru, loke ta hunga un ròl hopi grandi pa por haña e partisipantenan di e islanan ruman.

Nan tin hopi gana di bin kompetí den regata di Boneiru pero e fecha ta hunga un ròl den esaki.

Esei ta hasi’é hopi difísil p’abo haña bo hendenan serka bo.

Sra. Saragoza mas aleu relashoná ku esaki a bisa, ku e ta kere ku mester sinta na tempu, pa momentu ku hasi kambio den agènda eskolar, pa hasi’é mesora ku nos por haña tambe e partisipashon di nos islanan ruman den nos regata.

Riba nos pregunta, sra. Saragoza a bisa tambe ku e interes pa otro aña ya t’ei.

Nan tabatin nan prepará pa e aña aki i tambe pa otro aña.

Tambe tin hopi interes di partisipantenan di Kòrsou pa loke ta e kategoria di “micro boats” ku a mustra hopi interes pa bin kompetí aki na Boneiru.

Tabatin lunanan ku e partisipantenan tabata yama e organisadónan na Boneiru i no tabatin un kontesta pa duna nan.

Esei debí ku ta yanüari a aserká Aquaspeed Bonaire pa organisá e regata.

Preparashonnan pa regata ta lokenan ku tin ku kuminsá delantá i pa regata di otro aña tambe nan ke hasi esaki, esta kuminsá prepará tempran.

Por ehèmpel momentu kubo tin yatenan den kompetensia bo mester tin huradonan internashonal.

E aña aki komo ku a fokùs riba lokal, tabatin un tim kla prepará kaba pa e kompetensianan, loke bo por adaptá sèmper, segun sra. Licetha “Liesje” Saragoza di Aquaspeed Bonaire Windsurfer”, a duna di konosé den entrevista.

Share This
error: Content is protected !!