KRALENDIJK – E sentro di akohida pa hóbennan despues di skol, Jong Bonaire ta informá mayor i hóbennan ku e sentro a habri su portanan bèk pa hóbennan, kuminsando djamars benidero 6 di òktober. Relashoná ku esaki, tin algun medida ku a wòrdu tumá ku ta lo siguiente:

Djamars i djaweps benidero Jong Bonaire ta habri for 12:30pm pa hóbennan di banda Nort di Boneiru ku ta e siguiente barionan: Antriol, Den Stashi, Lagun, Mèxico, Hato, Nort Saliña, Republiek, Santa Rosa, Tras di Montaña i Rincon.

Djarason i Djabièrnè benidero Jong Bonaire ta habri for di 12:30pm pa hóben di banda Sùit di Boneiru ku ta e siguiente barionan: Playa Pariba i Playa Pabou, Sabana, Nikiboko, Tera Kòrá, New Amsterdam, Wanapa, Kralendijk, Amboina, Den Chèfi, i Belnem.

Reglanan di higiena manera entre otro laba man lo wòrdu apliká mas fuerte ku den pasado. Tur dosente di e sentro ta obligá pa bisti tapa boka na momentu ku nan tin kontakto ku un hóben. Aktividatnan lo wòrdu repartí den grupo chikitu pa mantené e distansia sosial i meskos na momentu ku hiba hóbennan kas den bùs.

Jong Bonaire ta tèrminá tur dia 5’or di atardi.

Share This
error: Content is protected !!