KRALENDIJK – Awor aparte di durante siman, Fundashon Cocari ta duna servisio tambe wikènt. Djasabra último tabatin apertura ofisial di e akohida den wikènt.

Genara Timp-Silberie di ‘Zorg en Welzijn Groep’(ZWG), a bisa ku esaki ta un logro grandi pa Rincon i Boneiru engeneral. E plan ta pa otro barionan tambe haña e fasilidat pa hendenan di edat ku aktividat durante fin di siman. Tin mas kos ku ta bai sosodé den bario Rincon pa e habitantenan. Esaki ta un komienso”, entre otro Genara a bisa.  

Boy Clarenda di COCARI: ”Awe ta un dia memorabel. Hopi trabou a tuma lugá pa yega na e dia ku entrante awor pa dilanti, Nos hendenan di edat por bishita Cocari durante siman manera kustumber i wikènt. Ta trata di un trayektoria largu pa yega pa por amplia servisio pa nos hendenan di edat avansá na Boneiru. E servisio durante fin di siman, esta djasabra, e hende por bishita Cocari i nan ta haña desayuno desente, bon kuminda kayente mèrdia, atenshon i kompañ’é wikènt. Normalmente e hendenan ta bishita Cocari durante siman, sinembargo a keda un bashí durante fin di siman. Tin un nesesidat pa e hendenan durante fin di siman. Entre otro pa motibu di soledat, sin noshon ku ta fin di siman i no tin niun aktividat. Nos a lucha hopi pa yega pa hasi esaki posibel. E trabou no ta kla. Esaki ta e promé parti. Awor a inisiá esaki pa hendenan di Rincon, sinembargo e idea ta pa hasié posibel pa esnan di edat di Playa tambe. Tur hende riba Boneiru ta rekerí e mes un oportunidat pa bishita un sentro di aktividat spesialmente pa hendenan di edat. E meta ta pa yega na duna servisio djasabra i djadumingu. Mester atendé pa esnan ku ta rekerí kuido i kompañ’é durante ora di atardi pa anochi. Esei ta e siguiente paso. Nos ta gradisí tur ku a yuda pa a hasi esaki un realidat”, Boy a bisa.  

Diputado Nina den Heyer a papia i a menshoná kon importante ta e logro. “ Despues di algun aña luchando nos a logra. Esaki ta e promé paso i trabou ta kontinuá pa mas oportunidat pa nos grandinan di Rincon, pa yega na un kas special pa hendenan di edat avansá na Rincon. E meta ta pa hasi esaki den otro barionan di Boneiru, sigur mirando awor e situashon aktual relashoná ku Covid-19. Sigur nos hendenan di edat ta rekerí mas atenshon ku normal. Nos ta gradisí tur ku a kere den e proyekto ku awe nos por ta kontentu ku el a bira un realidat. Pabien pa tur e hendenan di edat ku e tremendo logro”, diputado den Heyer a bisa.  

Silvana Janga-Serfilia direktor di direktorado di komunidat di kuido, a menshoná ku hopi trabou a tuma lugá i ta bai sigui pa logra mas. “Loke nos a logra awor ta un logro importante. Esaki ta na bienestar di nos hendenan di edat avansá. E meta ta pa saka e hende for di su kas den soledat i laga nan topa ku otronan i duna nan e atenshon nesesario. Nos huntu a hasi hopi esfuerso pa logra loke ta awor mas servisio pa e hende. Tabata notabel ku e hendenan tabata deseá mas momentu na Cocari. Meskos ta bai hasi esaki pa otro bario tambe. Ta bai kontinuá pa mas servisio pa nos hendenan di edat na Boneiru. No ta fásil, sinembargo nos tin ku sigui pusha pa hasié un realidat. Mester krea awor mas espasio pa e hendenan ta poko riba distansia relashoná ku e asuntu di vírùs. Henter un proseso ta andando pa yega na diferente servisio pa nos hendenan di edat riba e isla di Boneiru”, Janga-Serfilia a bisa.        

Potrètnan kortesia: Rudolf Wout.

Potrètnan kortesia: Rudolf Wout.

Share This
error: Content is protected !!