KRALENDIJK – Djadumingu algu promé ku 2’or di mèrdia a drenta notifikashon riba e number 911 na warda di Polis ku un aksidente di tráfiko a kaba di tuma lugá riba e kaminda ku ta kondusí pa Rincon na altura di ‘Wanta Brek Snèk’. Promé indikashon tabata mustra ku ta trata aki di un aksidente serio. P’esei a dirigí dos ambulans pa e sitio i a manda pidi tambe ‘rescue wagen’ di kuerpo di bombero pa bin yuda mirando ku un di e vehíkulonan a bai resultá den mondi despues di e choke.

For di un investigashon preliminar ku a hasi na e sitio ta indiká ku un vehíkulo Audi koló shinishi (Outo 1) bayendo direkshon Playa lo mester a baha velosidat pa bai lora na altura di e snèk menshoná i un pikòp Toyota Hilux (Outo 2) biniendo ku velosidat haltu no por a wanta brek na tempu i konsekuentemente a dal tras di e Audi. E outo di famia a bai resultá kantu di kaminda i e pikòp den mondi.

Polis di tráfiko i CRS a presentá na e sitio pa tuma datonan di e aksidente. E shofùr i pasahero di e pikòp tabata levemente herida i personal di ambulans a chèk nan na e sitio mes. Shofùr di e outo tabata keha di doló na su garganta i ambulans a transporté pa hòspital pa kòntròl médiko. Daño material na ambos vehíkulo ta konsiderabel.

Share This
error: Content is protected !!