KRALENDIJK – Outoridatnan polisial awe mainta trempan a duna òrdu na e departamentu di R&O di gobièrnu di Boneiru, pa sera kaya na altura di Bulevar Gobernador N. Debrot, pa ta eksakto, na altura di Yachthaven inmediatamente. Pa di tantísimo biaha laman ta subi kaminda na e sitio menshoná. Na momentu ku esaki kuminsá seka, ta keda un kapa di salu riba kaminda ku ta peligroso. Esaki por pone ku un vehíkulo por slep fásil na momentu ku pasa riba e kapa di salu. E ta mas peligroso ku na momentu ku tin awa so. Awe mainta no tabata un eksepshon, pa motibu ku tabatin algun aksidente di tráfiko den ménos ku un ora riba e pida kaminda aki. E awa salu ta keda lèk bou di bo outo i ta karga esaki hiba meternan mas leu.

Manehando bo vehíkulo ku velosidat abou pasando den e awa salu por hinkabo den problema inesperá. E situashon tin algun aña kaba ku ta okashoná diferente aksidente di tráfiko i asta den pasado morto a yega di kai. Prensa Boneriano a kritiká pa drecha e situashon aki na vários okashon sin ku e departamentu di gobièrnu di Boneiru hasi algu na e situashon. A pone te asta gezaghèber di Boneiru ku ta responsabel pa seguridat den tráfiko na altura di e situashon aki vários bia. E eks hefe di e tempu aya DROB, a asta bin ku un plan pa remedia e situashon, pero niun gobièrnu ku a sinta no a hasi nada ku e situashon. Luna pasá a traha un kaminda di tera temporal parti pariba di kaya pa por desviá na momentu ku awa salu subi kaminda di asfalt. Sinembargo e kaya a keda habri normal. Pues outomobilistanan mester skohe si nan ta pasa den awa salu òf si ta uza e kaminda di tera.

Gobièrnu di Boneiru a saka un komunikado partisipando ku a traha un kaya temporal pa outomobilistanan por desviá, sinembargo na niun momentu a skibi ku ta bai hasi algu na e situashon. Por ehèmpel di traha un brùg na e sitio pa e awa di laman por pasa bou di dje. E situashon tin ku keda asina pa semper? Mas aksidente ku morto tin ku sosodé pa hasi algu na e situashon? No ta tur hende ta konsiente ku esaki ta awa salu i ta pasa aden sin tene kuenta ku e por kousa daño na nan vehíkulo. Turistanan tambe ta pasa aden kousando daño na vehíkulonan di kompanianan di hür. Esaki pa motibu ku nan no sa di esaki, i ta pensa ku ta awa di áwaseru. Pa motibu ku un outo a slep bai pega den un kurá di blòki i despues un persona riba skuter a slep kai, a duna òrdu pa mesora laga sera e kaya awe mainta pa’sina obligá outomobilistanan pa uza solamente e kaminda di tera. Ta spera ku pronto ta hasi algu na e situashon. Potrètnan ta na momentu ku un funshonario di gobièrnu a kaba sera e kaya pa obligá tur outomobilista uza e kaminda temporal di tera pa sigui nan ruta.

Share This
error: Content is protected !!