KRALENDIJK – Djaluna mainta trempan alrededor di 6:30 un aksidente di tráfiko a tuma lugá riba Bulevar Gobernador N. Debrot. Shofùr di un KIA shinishi biniendo for di Yachthaven direkshon Playa a pèrdè kòntròl den bògt na momentu ku su vehíkulo a slep. Konsekuentemente el a bai dal kontra e kurá di blòki di e negoshi ‘Between To Buns’. Shofùr di e vehíkulo a splika ku e no tabata koriendo ku velosidat haltu i diripiente a hañ’é den e situashon. Kaminda muhá debí na laman ku ta subi kaya na altura di Yachthaven pa di tantisimo biahá ta okashoná aksidente di tráfiko. Ambulans a presentá na e sitio pa atendé ku e shofùr ku a keda basta spantá despues di e aksidente. A transportá e dama pa hospital pa por sigui haña tratamentu debí na algun herida chikí ku el a risibí. Estando na e sitio, polisnan a haña nan ta atende tambe ku un persona ku a slep ku su skuter pa mesun motibu. Outoridatnan polisial mesora a aktua i a manda yama e departamentu di R&O di gobièrnu di Boneiru pa sera e kaya na yachthaven di inmediato pa motibu di laman ku ta subi kaminda i ku awa salu ta keda para, pa evitá mas aksidente. CRS a presentá pa registrá e aksidente aki.

Share This
error: Content is protected !!