KRALENDIJK – “Corona vírùs no ta respetá bon kondishon di salú manera ta wòrdu bisá. Mi ta un persona ku ta kome relativamente saludabel, bai ‘gym’ i ta leu di yega 60 aña. Corona vírùs a ponemi algun dia den hòspital.” Esaki ta loke Elton Pietersz, un Boneriano bibá na Hulanda, ku ta kompartí un eksperensia ku a tèrminá siman pasá.

“Mi a kuminsá sinti malu riba djaweps 24 di sèptèmber, miéntras mi tabata na trabou. Mi tabata traha huntu ku algun kolega, i por a nota ku nan tabata tosa straño de bes en kuando. Mi a bisa mi doño di trabou ku e situashon ku nos ta traha aden, no ta bon debí na e pandemia di COVID-19. Despues ku mi a bis’é, mi kurpa a bira mas malu i mi a opta pa bai kas. Mi a bai traha sita pa pasa tèst di corona vírùs i mi a haña un lugá djaluna e siguiente siman. Djabièrnè mi a keda kas i e kurpa tabata menasá poko mas fastioso ku djaweps. Momentu ku mi a informá e doño di trabou di mi kondishon di salú, el a menshoná: awor ta un temporada di aña normal ku hende ta sinti nan mes ku poko fèrkout, bon bisá poko gripig manera ta bisa. No ta nada partikular pa bira prekupá, el a bisa. Tin otro kolega di trabou ku tambe a plania pa bai hasi tèst.”  

Wikènt hopi malu 

“Wikènt mi a pasa malu na kas ku keintura i hopi doló di kabes. Mi tabata informá mi famianan na Boneiru pa nan ta na altura kiko ta sosodé. Djaluna mainta e tèst a tuma lugá i mi tabatin un pre sentimentu ku mi tin COVID-19.  

Miéntras mi tabata sperando resultado, e doño di trabou a bèl i bisami si mi por bin traha, pasobra tòg ainda no ta sigur ku mi tin e vírùs, i tin trabou pa tèrminá. Riba e mes un dia nan a bèl informá ku mi tèst ta positivo pa COVID-19, loke no tabata un sorpresa. Ta trata di tur indikashon ku un kolega di trabou a pegami ku e vírùs, pasobra nos situashon di trabou no ta tene kuenta ku nada pa no kontagiá otro. Keho nan a sigui na kas: doló di kabes, no por drumi anochi, kome minimal.  

Su manisé djamars mi a yama hòspital pa manda ambulans, pasobra mi tabatin henter anochi hopi problema ku halamentu di rosea i doló di kabes. Wardando ambulans mi a pensa ku mi no ta sobrebibí. Ambulans a yega i nan a atendémi na e sitio, i a bai hòspital kumi. Mi a keda tres dia ku difikultat pa hala rosea i hopi doló di kabes. Djaweps mi a bai kas i e kurpa a kuminsá rekuperá. Halamentu di rosea a kuminsá regulá. Mi mester a paga 400 Euro pa e servisio di ambulans. Hulanda ta bon, sinembargo solo so ta sali pòrnada. Asina mes tin biaha ta resa mester resa pa e sali. Mi a sigui rekuperá durante wikènt na kas i djaluna 5 di òktober mi a bai dòkter pa un kontròl i nan a bisami si despues di 24 ora no tin keho, mi ta liber di e vírùs. Mi sa ku e kos aki a spanta mi mama i tata na Boneiru. Sierto momentu nan no a tende dimi. Mi tabata hopi malu i no por a atendé ku telefon.  

Keremi kuida kurpa   

Keremi kuida kurpa pa e COVID-19. Mi ta un hende ku ta move hopi den entre otro ‘gym’, kome saludabel mayoria bia, i e kos aki a dal mi duru ponemi awa na wowo. Corona vírùs no ta ekskluí hende ku bon salú manera nan ta bisa. Mi ta sospechá ku mi a pega ku e vírùs na trabou, sinembargo no ta sigur. Por ta posibel tambe mishimentu na algu i sin pone atenshon pone man na kara òf algu asina. Mi ta bisti tapa boka práktikamente tur kaminda ku eksepshon di na kas. Un kos pa bo ta sigur liber di corona vírùs, evitá di ta den kontakto ku hende i mishi aki aya”, Elton Pietersz a bisa. 

Share This
error: Content is protected !!